३० हजारासाठी अडकला भ्रष्टाचाराच्या सापळ्यात..!

चंद्रपूर :-प्रकल्पग्रस्त प्रमाणपत्राच्या पुर्नपडताळणी अहवालासाठी ३० हजाराची लाच घेणारा चंद्रपूर जिल्हा पुर्नवसन कार्यालयातील सहाय्यक महसूल अधिकारी आज,रविवार २८ सप्टेंबर रोजी एसीबीच्या जाळ्यात अडकला.नरेंद्र विठोबाजी खांडेकर असे लाच प्रकरणी अटक करण्यात आलेल्या आरोपीचे नाव आहे.खांडेकर याने सुरुवातीला तक्रारदारास २ लाख रुपयांची मागणी केली होती.एवढी रक्कम देणे शक्य नसल्याने तडजोड करण्यात आली.त्यानुसार जुलै २०२५ मध्ये तक्रारदारांनी १ लाख रुपये दिले होते,तर उर्वरित ३० हजार रुपये अहवाल पाठवितांना देण्याचे ठरले होते.तत्पूर्वी तक्रारदाराने लाच लुचपत प्रतिबंधक विभागाकडे तक्रार दाखल केली.तक्रार प्राप्त होताच पंचासमक्ष पडताळणी करण्यात आली व आज रविवारी सापळा रचून खांडेकर यांनी ३० हजाराची लाच स्वीकारताच रंगेहाथ अटक करण्यात आली.यातील तक्रारदार हे प्रकल्पग्रस्त असून चंद्रपूरचे रहिवासी आहेत.तक्रारदार यांच्या मुलीची प्रकल्पग्रस्त राखीव जागेतून निवड झाल्याने नियुक्तीसाठी आवश्यक असलेल्या प्रकल्पग्रस्त प्रमाणपत्राच्या पुर्नपडताळणी अहवालासाठी खांडेकर यांनी लाचेची मागणी केली होती.पहिल्यांदा १ लाख रुपये देऊनही पैश्याची हाव सुटलेली नसल्याने दुसऱ्या वेळेस लाच लुचपत प्रतिबंधक विभागाचा झटका देण्यात आला.