चिमुकलीचा वाढदिवस साजरा होत असतांनाच कोसळली इमारत; चिमुकलीसह आईचा मृत्यू..

मुंबई :-एक वर्षीय चिमुकलीचा वाढदिवस असल्याने घरातील कुटूंबीय आनंदात होते.वाढदिवसाची तयारी झाली आणि वाढदिवस साजरा करणार तितक्याच धाडकन चार मजली इमारतीचा एक भाग कोसळल्याने यात चिमुकलीसह आईचा मृत्यू व अन्य एकाचा मृत्यू झाल्याची घटना काल मंगळवारच्या रात्री उशिरा मुंबईतील विरार परिसरात घडली.

विरारच्या नारंगी फाटा परिसरातील रमाबाई अपार्टमेंट येथील इमारतीच्या चौथ्या मजल्यावर राहणाऱ्या जोयल कुटुंबातील एका एक वर्षीय चिमुकलीचा काल मंगळवारच्या रात्री वाढदिवस साजरा केला जात होता.वाढदिवस साजरा करणार तोच अचानकपणे इमारतीचा एक भाग कोसळल्याने आनंदावर दुःखाचे सावट पसरले.घटनेची माहिती होताच अग्निशमन दल, पोलिस,राष्ट्रीय आपत्ती व्यवस्थापन पथक (एनडीआरएफ)व स्थानिक प्रशासनातर्फे मदतकार्य सुरू असून आतापर्यंत पाच जणांना वाचवण्यात यश आले आहे.पाच जणांवर लगतच्या रुग्णालयात उपचार सुरू आहेत.ढिगाऱ्याखाली चिमुकलीच्या वडिलांसह अजून १५ ते २० जण अडकल्याची शक्यता वर्तविण्यात येत असल्याने मृतांचा आकडा वाढण्याची शक्यता आहे.एकीकडे राज्यात गणेशोत्सवाचा आनंद साजरा होत असतांनाच दुर्दैवी घटना घडल्याने परिसरात शोककळा पसरली आहे.