बस-दुचाकीची धडक; तरुणाचा मृत्यू.. – देसाईगंज-कुरखेडा मार्गावरील शंकरपूर जवळील आजची घटना..

देसाईगंज(गडचिरोली):-देसाईगंज तालुक्याच्या देसाईगंज-कुरखेडा मार्गावरील शंकरपूरच्या गाढवी नदी पुलाजवळील वळणावर बस आणि दुचाकीची समोरासमोर धडक होऊन अपघातात दुचाकी चालक तरुणाचा उपचारादरम्यान मृत्यू झाल्याची घटना आज,सोमवार २१ जुलै रोजी सायंकाळी पाच वाजेच्या सुमारास उघडकीस आली.पिंटू उर्फ महेश मधुकर देशमुख वय २९ वर्षे,रा.आझाद वॉर्ड,कुरखेडा, जि.गडचिरोली असे अपघातात मृत पावलेल्या तरुणाचे नाव आहे.

प्राप्त माहितीनुसार,पिंटू हा आज सोमवारी दुपारच्या सुमारास कुरखेडा वरून एकटाच एमएच ३३ एक्स ७७३५ क्रमांकाच्या दुचाकीने उसेगाव जवळील अरतोंडी येथील एका नातेवाईकाच्या घरी शेतीच्या खताची चुंगडी नेऊन देण्यासाठी गेला होता.खताची चुंगडी दिल्यानंतर तो देसाईगंजला काही कामानिमित्त गेला.काम आटोपून पिंटू कुरखेडा जाण्यासाठी निघाला होता.अश्यातच शंकरपूरच्या गाढवी नदी पुलाजवळील वळणावर येताच एमएच १३ सीयु ७५१६ क्रमांकाची गडचिरोली डेपो आगाराची

बस कुरखेड्यावरून देसाईगंजकडे येत होती. त्याचवेळेस दुचाकी चालक पिंटू व बसची समोरासमोर धडक झाली.धडकेत दुचाकीस्वार रस्त्यावर कोसळून गंभीर जखमी झाला.सदरचा मार्ग रहदारीचा असल्याने मार्गावरून ये-जा करणाऱ्या नागरिकांनी तातडीने १०८ क्रमांकाच्या रुग्णवाहीकेस पाचारण करून जखमीला देसाईगंज ग्रामीण रुग्णालयात उपचारासाठी दाखल केले.रुग्णालयात उपचार सुरू असतांनाच पिंटूचा मृत्यू झाला.प्रकरणी देसाईगंज पोलीसांनी मर्ग दाखल करून महामंडळाची बस देसाईगंज पोलीस स्टेशनला जमा केली.

पिंटू उर्फ महेश यास पाच वर्षाचा मुलगा असून पत्नीचे माहेर देसाईगंज शहराच्या जुनी वडसा येथील आहे. पिंटूच्या मृत्यूने सर्वत्र हळहळ केली जात आहे.