कुरखेडा तालुक्यातील जांभूळखेडा हल्ल्याचा प्रमुख सूत्रधार नक्षलवादी अटकेत..

गडचिरोली :-जिल्ह्याच्या भामरागड उपविभागांतर्गत येणाऱ्या कवंडे पोलीस स्टेशन हद्दीतील जंगल परिसरात घातपात करण्याच्या दृष्टीने रेकी करणाऱ्या एका जहाल नक्षलीस गडचिरोली पोलिसांचे विशेष पथक व केंद्रीय राखीव दलाच्या ३७ बटालियनने संयुक्त कारवाई करीत अटक केली आहे.विशेष म्हणजे,अटक करण्यात आलेला जहाल नक्षली उपकमांडर रँकचा असून १ मे २०१९ रोजी कुरखेडा तालुक्याच्या जांभूळखेडा जंगल परिसरात झालेल्या भूसुरुंग स्फोटातील कटकारस्थानात प्रमुख सूत्रधार असल्याचे समोर आले आहे.स्फोटात गडचिरोली पोलीस दलाचे १५ जवान शहीद झाले होते.अंकल ऊर्फ मन्नू सुलगे पल्लो वय २८ वर्षे,रा.कवंडे,ता. भामरागड,जि.गडचिरोली असे अटकेतील नक्षलवाद्याचे नाव आहे.२९ मार्च २०२१ रोजी खोब्रामेढा जंगल परिसरात झालेल्या चकमकीवरून  त्याचे नाव समोर आले होते.यापूर्वी त्याच्यावर पुराडा पोलीस ठाण्यात अप.क्र.११/२०२१ अंतर्गत चकमक व खूनाचे असे पाच गुन्हे दाखल आहेत.२०१७ ते २०२० पर्यंत कोरची दलममध्ये उपकमांडर पदावर कार्यरत होता.अंकल पल्लोवर शासनाने सहा लाख रुपयांचे बक्षीस जाहीर केले होते.पुढील तपासाकरिता त्यास कुरखेडा पोलिसांच्या ताब्यात देण्यात आले असता आज,शनिवार २८ जून रोजी कुरखेडा न्यायालयाने ७ दिवसांची पोलीस कोठडी सुनावली आहे.