नक्षल्यांकडून निष्पाप लोकांची हत्या; तिघांना लटकवले फासावर..

उद्रेक न्युज वृत्त :-नक्षलवादी संघटनेच्या अनेक मोठ्या नक्षलवाद्यांचा खात्मा करण्यात येत आहे. त्यातच काहीजण नक्षली संघटनेला रामराम ठोकून आत्मसमर्पण करू लागलेत.त्यामुळे नक्षलवादी बिथरून निष्पाप लोकांची हत्या करू लागल्याची घटना काल,मंगळवारी दुपारच्या सुमारास छत्तीसगडच्या बिजापूर जिल्ह्यातील पेड्डाकोर्मा गावात घडली.बिथरलेल्या नक्षलवाद्यांनी पहिल्यांदा तिघांचे अपहरण केले व नंतर जंगलात नेऊन तिघांनाही फासावर लटकवले.झिंगू मोडियम,सोमा मोडियम या दोन नागरिकांसह अनिल माडवी या विद्यार्थ्याचा यात समावेश आहे.झिंगू व सोमा हे आत्मसमर्पित नक्षलवादी होते.याशिवाय नक्षलवाद्यांनी सात गावकऱ्यांनाही बेदम मारहाण करून जखमी केले आहे.मारण्यात आलेले तिघेही आत्मसमर्पण करणाऱ्या दिनेश मोडियमचे जवळचे नातेवाईक होते.नक्षलवादी नेता वेल्ला आणि त्याच्या टीमने ही घटना घडवून आणल्याचा पोलिसांनी संशय व्यक्त केला आहे. याप्रकरणी रात्री उशीरापर्यंत पोलिसात तक्रार नोंदवण्यात आलेली नव्हती.घटनेने गंगापूर परिसरातील पेड्डाकोर्मा सह बिजापूर जिल्ह्यात भीतीचे वातावरण पसरले आहे.