चक्क चालत्या वाहनावर कोसळला ६० किलो वजनाचा सिमेंटचा गोळा; कार चालक जखमी..

नागपूर :-चालत्या चारचाकी वाहनावर उड्डाणपुलाचा ६० किलो वजनाचा सिमेंटचा गोळा कोसळल्याने कारचा वरील भाग दबल्या गेला तर कार चालक जखमी झाल्याची घटना आज,शुक्रवारी २१ फेब्रुवारीला नागपूरच्या प्रजापती नगर चौक,एचबी टाऊन परिसरात घडली.यात कारचालक विशेष श्रीवास्तव किरकोळ जखमी झाले.घटनेची माहिती होताच परिसरातील नागरिकांनी उड्डाणपुलाचा काही भाग कोसळला म्हणून घटनास्थळी धाव घेतली.विशेष श्रीवास्तव हे कार क्रमांक-एमएच ३१ एफआर १४५५ ने प्रजापती नगर परिसरातून जात होते.त्यातच चालत्या कारवर पारडी उड्डाणपुलाचा ६० किलो वजनाचा एक सिमेंटचा गोळा पडला.उड्डाणपुलाचा गोळा पडताच कार चालकाची भंबेरी उडाली.यात कारचे मोठे नुकसान झाले असून नागरिकांमध्ये भीतीचे वातावरण आहे.उड्डाणपुलाच्या भागाला तडे गेल्याने आणखी अपघात होण्याची भीती व्यक्त केली जात आहे.त्यामुळे प्रशासनाने उड्डाणपुलाच्या दुरुस्तीकडे लक्ष देण्याची मागणी नागरिकांकडून व्यक्त केली जात आहे.