चक्क सहाय्यक पोलिस निरीक्षक अडकला एसीबीच्या जाळ्यात… – जमीन प्रकरणात गुन्हा दाखल न करण्याची सेटिंग भोवली…

नागपूर :-एका जमीन प्रकरणात गुन्हा दाखल न करण्याची दोन लाख रुपयांची सेटिंग कोराडी पोलिस ठाण्यातील सहाय्यक पोलिस निरीक्षकास भोवली असून दोन लाखांची लाच घेतांना एसीबीच्या पथकाने काल,बुधवारी दुपारच्या सुमारास रंगेहाथ अटक केली असल्याने पोलिस विभागातील भ्रष्टाचारी तत्त्वांचा मुद्दा परत एकदा समोर आला आहे.प्रेमानंद दादाराव कात्रे वय ४३ वर्षे असे अटक करण्यात आलेल्या सहाय्यक पोलिस निरीक्षकाचे नाव आहे.

एका व्यक्तीविरोधात मौजा कवठा,कामठी येथील संयुक्त मालकीच्या शेतीच्या विक्रीपत्राच्या व्यवहारात फसवणूक केल्याची तक्रार एका महिलेकडून आली होती.या प्रकरणात गुन्हा दाखल करण्याची भीती कात्रेने दाखविली होती.जर गुन्हा दाखल करायचा नसेल व प्रकरण दाबायचे असेल तर दोन लाख रुपये लागतील, असे कात्रेने संबंधित व्यक्तीला म्हटले होते. संबंधित व्यक्तीने लाचलुचपत प्रतिबंधक विभागाकडे तक्रार केली.या प्रकरणाची प्राथमिक शहानिशा करून एसीबी पथकाने सापळा रचला.काल बुधवारी ५ फेब्रुवारीला दुपारच्या सुमारास कोराडी पोलिस ठाण्यात संबंधित व्यक्तीकडून दोन लाखांची लाच स्वीकारली असता एसीबीच्या पथकाने कात्रेला रंगेहाथ पकडले. संबंधिताने अगोदर पैसे देण्यास नकार दिला होता व गावातीलच सरपंचाच्या मदतीने प्रकरण सोडविण्याची भाषा केली होती.मात्र,तात्काळ अटक करण्याची धमकी कात्रेने दिल्याने संबंधित व्यक्तीने अखेर एसीबीकडे धाव घेतली.कात्रेविरोधात कोराडी पोलिस ठाण्यातच गुन्हा दाखल करण्यात आला आहे.प्रकरणी पोलिस निरीक्षक प्रीती शेंडे, नीलेश उरकुडे,भरत ठाकूर,भागवत वानखेडे,हेमराज गांजरे,दीपाली भगत,विजय सोळंके यांनी कारवाई केली.