धमकी देत सहा महिने अत्याचार करणारा आरोपी एक महिन्यापासून फरारच..

गोंदिया :-एका ४० वर्षीय नराधम इसमाने मतिमंद मुलीवर तब्बल सहा महिने सतत अत्याचार केला. पिडीत मुलगी गर्भवती राहिल्याने सदर प्रकार उघडकीस आला.पोलिसांत तक्रार दाखल होताच नराधम आरोपी फरार झाला असून एक महिना लोटूनही आरोपी फरारच असल्याने ग्रामीण पोलिस स्टेशन ग्राम तांडा यांच्यापुढे मोठे आव्हान उभे येऊन ठाकले आहे.आरोपी भूमराज ऊर्फ नानू माणिकचंद चौधरी वय ४० वर्षे,रा.मोहगाव-बुज.याने जुलै ते ६ डिसेंबर २०२४ दरम्यान,एका गतिमंद मुलीला ठार मारण्याची धमकी देत तिच्यावर वारंवार अत्याचार केला.या घटनेची वाच्यता कुणाकडे करू नकोस अन्यथा तुला ठार करीन अशी धमकी तो मुलीला देत होता.यामुळे त्या मुलीने या प्रकरणाची वाच्यता कुणाकडे केली नाही.मात्र,मुलगी गर्भवती राहिल्याने मुलीच्या आईच्या तक्रारीवरून ग्रामीण पोलिसात भारतीय न्याय संहिता कलम ६४ (२) (के)(एम),३५१ (२), (३) अंतर्गत गुन्हा दाखल करण्यात आला.मात्र, सदर आरोपी अद्यापही फारचच असल्याने नराधमास तात्काळ अटक करून कारवाईची मागणी करण्यात येत आहे.