शासकीय कामांत अनियमितता; शिक्षणाधिकारी निलंबित…

चंद्रपूर :-जिल्हा परिषदेच्या तत्कालीन शिक्षणाधिकारी (माध्यमिक)कल्पना चव्हाण यांच्यावर शालेय शिक्षण व क्रीडा विभागाचे सहसचिव टी.वाय. करपते यांनी निलंबनाची कारवाई केली.सदरच्या कारवाईने शिक्षण विभागात एकच खळबळ उडाली आहे.चव्हाण ह्या सध्या जळगावच्या जिल्हा परिषदेमध्ये माध्यमिक शिक्षणाधिकारी पदावर कार्यरत आहेत.

चंद्रपूरच्या माध्यमिक शिक्षण विभागात कल्पना चव्हाण या तीन वर्षांपूर्वी रुजू झाल्या होत्या.त्यांच्या कार्यकाळात शिक्षक-शिक्षकेतर कर्मचाऱ्यांची प्रकरणे प्रलंबित ठेवली जात होती.महाराष्ट्र राज्य शिक्षक परिषदे संघटनेला कर्मचाऱ्यांच्या बऱ्याच तक्रारी सतत प्राप्त होत होत्या.शासकीय कामांत अनियमितता करणे,यासह त्यांच्यावर गंभीर आरोप होते.विदर्भ माध्यमिक शिक्षक संघाच्यावतीने आमदार सुधाकर अडबाले यांनी त्यांच्याविरुद्ध अनेकदा आंदोलने केली. अखेर शिक्षण उपसंचालक नागपूर यांच्या तपासणी पथकाने शिक्षणाधिकारी (माध्यमिक) कार्यालयाची चौकशी केली.

त्यात त्या दोषी आढळून आल्या.चव्हाण यांना महाराष्ट्र नागरी सेवा (शिस्त व अपील) नियम १९७९च्या नियम १० अन्वये आयुक्त (शिक्षण) पुणे यांनी दोषी ठरविले होते.मात्र,निलंबनाची कारवाई झाली नव्हती.याबाबत आमदार अडबाले यांनी ५ जुलै २०२४ रोजी अधिवेशनात तारांकित प्रश्न उपस्थित केला होता. चव्हाण यांना कारणे द्या नोटीस बजावण्यात आले. नोटीसला उत्तर मिळाल्यानंतर निलंबित करण्याचा निर्णय सोमवारी २६ ऑगस्ट रोजी घेण्यात आला.

निलंबन काळात खासगी नोकरी अथवा व्यवसाय केल्यास त्या गैरवर्तणुकीबाबत दोषी ठरतील व कारवाईस पात्र ठरून निर्वाह भत्त्यावरील हक्क गमावून बसतील,असेही निलंबन आदेशात नमूद केले आहे.