८० वर्षीय आजीबाईने विभागीय आयुक्तांपुढे व्यक्त केला संताप… – मुलाने अंगठ्याचे ठसे घेवून घर व दुकान स्वत:च्या नावावर करुन घेतले…

नागपूर :-मुलाने अंगठ्याचे ठसे घेवून घर व दुकान

स्वत:च्या नावावर करुन घेतले.डोक्यावरचे छप्पर गेले, रहायला जागा नाही.कुठे आसरा घेणार! असा संताप जरीपटका भागातील भोजवंताबाई शेंडे वय ८० वर्षे यांनी विभागीय आयुक्तांपुढे व्यक्त केला.या प्रकरणातील पोलीस चौकशी व सद्यस्थितीची माहिती घेवून संबंधित प्राधिकरणास अर्ज करण्यास सांगत तात्काळ मदतीसाठी विभागीय आयुक्तांनी आजीबाईंना सोबत कर्मचारी देत उपविभागीय अधिकारी कार्यालयात पाठविले.

विभागीय लोकशाही दिनाच्या निमित्ताने आज १२ ऑगस्ट रोजी तीन तक्रारी प्राप्त झाल्या.आजीबाईंचा प्रश्न विभागीय लोकशाही दिनाशी संबंधित नव्हता, तरीही तो समजून घेवून त्यावर उचित तोडगा काढून दिलासा देण्यात आला.संबंधित पोलीस उपायुक्तांकडून माहिती घेण्याच्या सूचना विभागीय आयुक्तांनी अधिकाऱ्यांना दिल्या.जेष्ठ नागरिक निर्वाह अधिनियमांतर्गत आजीबाईंना मदत देण्यासंदर्भात सूचना देण्यात आल्या.उपायुक्त प्रदीप कुलकर्णी यांनी नागपूर शहराच्या उपविभागीय अधिकाऱ्यांना थेट दूरध्वनीहून सूचना केल्या.

राज्य शासनाने माता-पिता व जेष्ठ नागरिक यांचा निर्वाह व कल्याण अधिनियम २००७ लागू केला आहे. त्यामध्ये माता-पित्यांच्या व ज्येष्ठ नागरिकांचा निर्वाह व कल्याण यासाठी हमी दिली आहे.या कायद्यामध्ये ज्येष्ठ नागरिकाचे अथवा माता-पिता यांना मूलभूत गरज व सुविधा त्यांची मुले देत नसल्यास अगदी त्यांना आई-वडिलांकडून प्राप्त मालमत्तेचे हस्तांतरण सुद्धा रद्द करण्यासंदर्भात या कायद्यात तरतूद आहे. तसेच मासिक निर्वाह भत्ता प्राप्त करण्यासाठी सुद्धा तरतूद करण्यात आली आहे.

तत्पूर्वी,भंडारा जिल्ह्यातील कोटांगले येथील नागरिकाची जुनी तक्रार आणि नागपूर महानगरपालिकेसंबंधित आलेल्या दोन तक्रारी आजच्या विभागीय लोकशाही दिनात समोर आल्या. पहिल्या तक्रारीत प्रशासनाकडून मुद्देनिहाय उत्तर मागविण्यात आले.या तक्रारीशी संबंधीत तलाठी व नायब तहसिलदार उपस्थित होते तर तक्रारदार अनुपस्थित होते.नागपूर मनपा संदर्भातील तक्रारीबाबत विभागीय आयुक्तांनी मनपात तक्रारदाराची एक आठवड्याच्या आत निराकरण करण्याचे आदेश दिले.