७ हजाराची लाच स्वीकारणारा ३४ वर्षीय तलाठी लाचलुचपत प्रतिबंधक विभागाच्या जाळ्यात… – पिकाची नुकसानभरपाई मिळवून देण्यासाठी १४ हजाराची केली होती मागणी..

नागपूर :-राज्य सरकारकडून पिकाची नुकसानभरपाई मिळवून देण्यासाठी १४ हजार रुपयांची मागणी करीत ७ हजार रुपयांची लाच स्वीकारणाऱ्या तलाठ्यास लाचलुचपत प्रतिबंधक (एसीबी) विभागाने काल,शुक्रवारी २९ नोव्हेंबरच्या सायंकाळी सावनेर शहरातील बसस्थानक परिसरात अटक केली.देवीदास पांडुरंग अंभोरे वय ३४ वर्षे असे अटक करण्यात आलेल्या लाचखोर तलाठ्याचे नाव असून,त्याची तलाठी कार्यालय खुबाळा,ता.सावनेर येथील कार्यालयात नियुक्ती होती.तक्रारकर्ता शेतकरी खुबाळा येथील रहिवासी असून,त्यांची याच गावाच्या शिवारात शेती आहे.राज्य सरकारने पिकांची नुकसानभरपाई जाहीर केली होती.ही नुकसानभरपाई मिळण्यासाठी शेतकऱ्याने तलाठी देवीदास अंभोरे याच्याशी संपर्क केला.सुरुवातीला त्याने टाळाटाळ केली आणि नंतर नुकसानभरपाई मिळवून देण्यासाठी १४ हजार रुपयांची मागणी केली.तडजोडीनंतर शेतकऱ्याने सात हजार रुपये देण्याचे मान्य केले.