स्टंटबाजी करणे पडले महागात; दोन तरुणांचा मृत्यू..

नागपूर :-दुचाकीने स्टंटबाजी करणे दोन तरुणांच्या जीवावर बेतल्याची घटना नागपूर शहराच्या वर्धा मार्गावरील जनता चौक ते बजाजनगर चौक दरम्यान १६ फेब्रुवारीच्या रात्री उशिरा घडली.दोन्ही तरुण जीटी बुलेटवरून चौकातून वेगवान फेऱ्या मारत होते. प्रत्यक्षदर्शींच्या मते,दोन्ही तरुणांनी दोनदा जनता चौक ते बजाजनगर या मार्गावरून सतत स्टंटबाजी केली आणि विष्णूजी की रसोई समोरून जात असतांना त्यांनी एका महिला दुचाकीस्वाराला कट मारण्याचा प्रयत्न केला असता त्यांचा बुलेटवरील ताबा सुटला आणि बुलेट रस्त्याच्या कडेला असलेल्या पिलरवर जाऊन जोरदार आपटली.यात युग विशाल चनकापूरे वय १९ वर्षे व रुद्र शशिकांत सोमकुंवर वय १९ वर्षे दोघेही रा.काचीपुरा, नागपूर यांचा घटनास्थळीच मृत्यू झाला.नागरिकांनी तात्काळ घटनास्थळी धाव घेत त्यांना रामदासपेठ येथील खासगी रुग्णालयात दाखल केले; मात्र डॉक्टरांनी दोघांनाही मृत घोषित केले.मृतक दोन्ही तरुण चांगले कबड्डीपटू असल्याने सर्वत्र हळहळ व्यक्त केली जात आहे.घटनेचा पुढील तपास  बजाजनगर पोलीस ठाणे करीत आहे.