सावधान..! सोशल मीडियाचा वापर जरा जपून.. – आक्षेपार्ह व्हिडीओसह फोटो एडिट करण्याचा धोका..

एआय तंत्रज्ञानाचा वापर करून दोन वेगळ्या व्यक्तींचे चेहरे जोडून खोटे फोटो तयार केले जातात,जे खरे वाटतात.अशा खोट्या फोटोंमुळे समाजात गैरसमज निर्माण होतात.अशा घटनांचा काही तरुणी तसेच महिलांना देखील फटका बसला आहे.अश्याच प्रकारची घटना चालू वर्षातील जुलै महिन्यात गोंदिया जिल्ह्यात उघडकीस आली होती.तिरोडा तालुक्याच्या लाखेगाव येथीय ३२ वर्षीय विवाहित महिला इन्स्टाग्राम वापरत होत्या.२४ मे २०२५ रोजी सकाळच्या सुमारास त्या मोबाइलवर इन्स्टाग्रामवर रिल्स पाहत असतांना एका अकाऊंटवर त्यांचा चेहरा असलेला आणि दुसऱ्या महिलेचे अर्धवट उघडे शरीर असलेला अश्लील फोटो आढळला होता.त्यानुसार गावातीलच २५ वर्षीय तरुणावर पोलिसांनी माहिती तंत्रज्ञान कायद्यांतर्गत व बदनामीच्या कलमान्वये गुन्हा दाखल केला होता.

एआय आधारित साधने आणि मोफत उपलब्ध ॲप्स एका क्लिकमध्ये चेहरा बदलून किंवा फोटो मॉर्फ करून चुका संदर्भातील प्रतिमा तयार करू शकतात.या प्रतिमांचा वापर करून प्रत्यक्ष व्यक्तींचे फोटो डार्क वेबवर विकले जातात आणि त्यावरून ब्लॅकमेलिंगही केले जाते. काही वेळा पीडितांना त्याची माहितीदेखील नसते. याशिवाय सायबर फसवणुकीचे गुन्हेदेखील यातून होतांना दिसून येतात.तुम्ही जेव्हा फोटो एडिट करण्यासाठी ॲपला तुमच्या गॅलरीची किंवा कॅमेऱ्याची परवानगी देता,तेव्हा तुमचा डेटा त्यांच्या सर्व्हरवर अपलोड होतो.हा डेटा नंतर चुकीच्या कामांसाठी वापरला जाऊ शकतो किंवा विकला जाऊ शकतो.अनावश्यक परवानग्या देऊन स्वतःचा डेटा धोक्यात घालू नका.जर फसवणूक झालीच,तर तात्काळ पोलिसांशी संपर्क साधा.तुमचा डिजिटल डेटा सुरक्षित ठेवणे ही तुमची जबाबदारी आहे,याची जाण नागरिकांना असली पाहिजे, असे सायबर पोलिसांकडून स्पष्ट करण्यात आले आहे.