शेअर मार्केट मध्ये रक्कम वाढविण्याचे आमिष दाखवून महिलेची फसवणूक…

भंडारा :-शेअर मार्केटमध्ये पैशाची गुंतवणूक करून रक्कम वाढविण्याचे आमिष दाखवून १३ लाख २३ हजार ७४५ रुपयांची महिलेची फसवणूक करण्यात आली असून या प्रकरणी प्रज्ञा लोणारे यांच्या तक्रारीवरून पवनी पोलिसांनी आठ कंपन्यांविरुद्ध गुन्हा नोंदविला आहे.

याबाबत असे की,प्रज्ञा नकटू लोणारे वय ३२ वर्षे, पवनीतील शिवाजीनगरात वानखेडे यांच्या घरी भाड्याने राहतात.त्यांनी पतीच्या मोबाइलवरून व्हॉट्सॲपचा वापर केला.यात शेअर मार्केटमध्ये पैशाची गुंतवणूक करून रक्कम वाढविण्याचे आमिष दाखविण्यात आले.महिलेकडून ३ ते २९ ऑक्टोंबर पर्यंत एकूण १३ लाख २३ हजार ७४५ रुपये सेंट्रल बँक ऑफ इंडिया शाखा पवनी येथील बँक खात्यातून मागविण्यात आले.त्यानंतर महिलेने कंपन्यांना रक्कम परत मागितली असता,पुन्हा २० टक्क्यांप्रमाणे एकूण १० लाख ५७ हजार ४९० रुपयांची मागणी करण्यात आली. मात्र,महिलेने मागणीची पूर्तता केली नाही.त्यांनतर महिलेचे खाते बंद करून त्यांना ग्रुपमधून बाहेर काढण्यात आले.आपली फसवणूक झाल्याचे लक्षात येताच महिलेने पवनी पोलिसात धाव घेऊन रीतसर तक्रार दिली.पोलिसांनी तक्रारीवरून आठ कंपन्यांविरोधात गुन्हा नोंदविला आहे.पुढील तपास सहायक पोलिस निरीक्षक मानकर करीत आहेत.