शालार्थ आयडी घोटाळ्याचे ‘पिक्चर अभी बाकी है’ ; तीन लीपिकांना बेड्या.. – आता अटकेतील एकूण आरोपींची संख्या चोवीस..

नागपूर :-जिल्ह्यातील शालार्थ आयडी घोटाळ्याचे ‘पिक्चर अभी बाकी है’,असे चित्र दिसून येत आहे.शांत होऊ घातलेला घोटाळा आणखी तग धरू लागला आहे. विशेष म्हणजे,घोटाळ्याचा तपास आता राज्यपातळीवरील विशेष तपास पथकाकडून सुरू आहे. अश्यातच तपासादरम्यान तीन कनिष्ठ लिपिकांनी संबंधित शाळांच्या मुख्याध्यापक,शिक्षणाधिकारी व तत्कालीन शिक्षण उपसंचालकांशी संगनमत करून बनावट शालार्थ आयडी तयार करून नोकरी मिळविली. त्यानंतर वेतन घेत त्यांनी शासनाची कोट्यवधींची फसवणूक केल्याचे उघड होताच सायबर पोलिस ठाण्याच्या पथकाने बऱ्याच दिवसांनी कारवाई करत तीन कनिष्ठ लिपिकांना अटक केली आहे.यात भांडेवाडीतील जगन्नाथ पब्लिक स्कूलमधील ३५ वर्षीय कनिष्ठ लिपीक यशवंत धकाते (विणकर वसाहत,मानेवाडा बेसा मार्ग),चरणदास प्रायमरी शाळेतील ३५ वर्षीय कनिष्ठ लिपीक जगदीश दिनकरराव ढेंगे(मंगलदीपनगर, मानेवाडा बेसा मार्ग),व वाठोडा ले आऊटमधील विद्या विकास उच्च प्राथमिक शाळेतील ३१ कनिष्ठ लिपीक अक्षय संजय मांडे (भगवाननगर,बैंक कॉलनी) यांच्याविरोधात गुन्हा दाखल करून त्यांना काल बुधवारी अटक केली आहे. शालार्थ आयडी घोटाळ्यातील अटकेतील एकूण आरोपींची संख्या आता २४ इतकी झाली आहे.यात ३ शिक्षण उपसंचालक,३ शिक्षणाधिकारी,१ वेतन अधीक्षक,३ मुख्याध्यापक,२ शाळा संचालक,३ सहाय्यक शिक्षक,६ लिपीक व ३ कनिष्ठ लिपिकांचा समावेश आहे.