विहिरीतून वाघाची डरकाळी; वाघास जीवनदान..

नागपूर :-शिकारीच्या शोधात जंगलातून शेतशिवारात भरकटलेला वाघ चक्क विहिरीत पडला असल्याची घटना सावनेर तालुक्यातील सिरोंजी शिवार खापा वनपरिक्षेत्रातील नागलवाडी परिसरात नुकतीच उघडकीस आली.घटनेची माहिती होताच रेस्क्यू टीमने वाघास विहिरीतून सुखरूप बाहेर काढून जीवनदान दिले.

शिवारातील गोवर्धन राऊत यांच्या शेतातील विहिरीत हा वाघ पडला होता.गोवर्धन राऊत पाणी पाजण्यासाठी बैलजोडी घेऊन शेतातील विहिरीजवळ गेले होते.बैलांना पाणी पाजत असताना त्यांना विहिरीतून वाघाची डरकाळी ऐकायला आली.त्यामुळे त्यांनी विहिरीत डोकावून बघितले असता आत वाघ पडला असल्याचे त्यांच्या निदर्शनास आले.माहिती मिळताच वनपरिक्षेत्र अधिकारी सचिन आठवले, नागलवाडीचे क्षेत्र सहायक सतीश गडलिंगे,वनरक्षक साहेबराव शेलार यांनी विहिरीची पाहणी केली आणि वरिष्ठ अधिकाऱ्यांसह टीटीसीला कळविले.नागपूर शहरातील ट्रान्झिट ट्रीटमेंट सेंटरच्या(टीटीसी) रेस्क्यू टीमने लगेच घटनास्थळ गाठून त्या वाघाला विहिरीतून सुखरूप बाहेर काढले.त्यानंतर वाघाला उपचारासाठी नागपूर शहरातील ट्रान्झिट ट्रीटमेंट सेंटरमध्ये नेण्यात आले.विहीर किमान ४५ फूट खोल होती.वाघास बाहेर काढतांना वनाधिकाऱ्यांची चांगलीच दमछाक झाली.