वनविभागाची धडक कारवाई; तब्बल १२ शिकारी ताब्यात.. – चार शेकरू,एक उडनारी खार,एक हरीनाल पक्षी, घुबड प्रजातीतील पक्षी व इतर अवयव हस्तगत..

गडचिरोली :-आलापल्ली वनपरिक्षेत्रात सामूहिक जंगल गस्ती दरम्यान वनविभागाने मोठी कारवाई करत १२ शिकाऱ्यांना ताब्यात घेतले असून त्यांच्या ताब्यातून वन्यजीवांचे अवयव व शिकारीसाठी वापरण्यात येणारे साहित्य जप्त करण्यात आले आहे. या प्रकरणी भारतीय वन अधिनियम,१९२७ तसेच वन्यजीव संरक्षण अधिनियम,१९७३ अंतर्गत गुन्हे नोंदविण्याची प्रक्रिया सुरू करण्यात आली आहे.

काल रविवारी सायंकाळच्या सुमारास जंगलात काही जण शिकारीसाठी लपून बसल्याची माहिती वनविभागाला प्राप्त झाली.त्यानंतर गस्ती पथकाने तत्काळ परिसरात सापळा रचून पाठलाग केला असता १२ जणांना ताब्यात घेण्यात आले.या कारवाईत शिकाऱ्यांकडून विविध वन्यजीवांचे अवशेष जप्त करण्यात आले.जप्त करण्यात आलेल्या वन्यजीवांमध्ये पारध केलेले चार शेकरू,एक उडनारी खार,एक हरीनाल पक्षी तसेच घुबड प्रजातीतील पक्षी व इतर अवयवांचा समावेश आहे.

सदरची कारवाई ही आलापल्लीच्या उपवनसंरक्षक  दिपाली तलमले व उपविभागीय वन अधिकारी  शिवपाल पवार यांच्या मार्गदर्शनाखाली वनपरिक्षेत्र अधिकारी गोरख गणवीर यांच्या नेतृत्वात पार पडली.या मोहिमेत क्षेत्र सहाय्यक पुन्नमचंद बुधवार,वनरक्षक  दत्ता सुरवसे,निलेश टेकाम,सुधाकर सोयाम,वाहन चालक सुरेश मडावी,चौकीदार श्याम जंगमवार, नामाजी मडावी व देवाजी सलामे आदी उपस्थित होते.

वन्यजीव संरक्षणाच्या दृष्टीने अशा प्रकारच्या अवैध कृत्यांवर वनविभागाचे सतत लक्ष असून पुढील काळातही कारवाया अधिक तीव्र करण्यात येणार आहेत. संशयास्पद हालचालींबाबत नागरिकांनी तात्काळ वनविभागास माहिती देण्याचे आवाहन वनपरिक्षेत्र अधिकारी गोरख गणवीर यांनी केले आहे.