रस्त्याने पायी जाणाऱ्या इसमाचा अज्ञात वाहनाच्या धडकेत घटनास्थळीच मृत्यू…

नागपूर :-रस्त्याने पायी जात असलेल्या व्यक्तीस

अज्ञात वाहनाने जोरात धडक देताच सदर व्यक्ती वाहनाच्या चाकाखाली आल्याने त्याचा घटनास्थळीच मृत्यू झाला असल्याची घटना नागपूर बुटीबोरी पोलिस ठाण्याच्या हद्दीत काल,शनिवारी २१ डिसेंबरला सकाळच्या सुमारास घडली.

गुरुदयाल झाडूलाल पटले वय ४९ वर्षे,रा.ठाकूर ले-आऊट,वर्धमाननगर,बुटीबोरी असे मृत व्यक्तीचे नाव असून,ते बुटीबोरी औद्योगिक क्षेत्रातील युनिटेक कंपनीत कार्यरत होते.काल,शनिवारी सकाळच्या सुमारास ते राष्ट्रीय महामार्गावरील सेंट क्लायरेट स्कूलजवळच्या काठियावाडी बेड्यावर दूध आणण्यासाठी गेले होते.दूध घेऊन ते घराकडे पायी जात असतांना,न्यू आगमन हॉटेल परिसरात मागून भरधाव येणाऱ्या अज्ञात वाहनाने त्यांना जोरात धडक दिली.त्यात ते वाहनाच्या चाकाखाली आल्याने त्यांचा घटनास्थळीच मृत्यू झाला.अपघातानंतर आरोपी वाहनचालक तेथून वाहन घेऊन पसार झाला. घटनेची माहिती मिळताच,बुटीबोरी पोलिस ठाण्याचे सहाय्यक पोलिस निरीक्षक विनोद जाधव यांनी पोलिस कर्मचाऱ्यांसह घटनास्थळ गाठले.पोलिसांनी पंचनामा करून मृतदेह उत्तरीय तपासणीसाठी शासकीय रुग्णालयात पाठविला.याप्रकरणी बुटीबोरी पोलिसांनी अज्ञात वाहनचालकाविरुद्ध गुन्हा दाखल केला असून, आरोपीचा शोध सुरू केला आहे.