उद्रेक न्युज वृत्त
चंद्रपूर :- चंद्रपूर लोकसभेच्या नवनिर्वाचित खासदार प्रतिभा धानोरकर यांचे सख्खे भाऊ प्रवीण काकडे यांनी त्यांच्या कार्यकर्त्यांच्या समोरच खासगी कोळसा खाणीच्या अधिकाऱ्यांना शिवीगाळ केली.खासदार प्रतिभा धानोरकर निवडून येताच खासदाराच्या भावाने हा पराक्रम केल्याने राजकीय वर्तुळात उलटसुलट चर्चा सुरू झाल्या आहेत.खासदार धानोरकर यांच्या बंधूंच्या प्रतापाची ध्वनी चित्रफित सामाजिक माध्यमांत व्हायरल झाल्याने खासदार धानोरकर यांच्या प्रतिमेला धक्का पोहोचला आहे.
चंद्रपूर जिल्ह्यातील भद्रावती तालुक्यात कर्नाटक एम्टा कोळसा खाण आहे.ही खाण कर्नाटक सरकारची आहे.या खाणीतील कोळसा वाहतुकीमुळे पिकांना मोठा फटका बसू लागला आहे.सोबतच प्रकल्पग्रस्तांचे प्रश्न आहेत.या प्रश्नांसंबंधी व्यवस्थापनासोबत चर्चा करण्यासाठी खासदार प्रतिभा धानोरकर गेल्या होत्या.त्यांच्यासोबत भाऊ प्रवीण काकडे आणि असंख्य कार्यकर्ते व प्रकल्पग्रस्त होते.
अधिकाऱ्यांशी चर्चा सुरू असतानाच प्रवीण काकडे यांनी अधिकाऱ्याला विचारपूस करता करता शिवीगाळ केली आणि त्याचवेळी एका व्यक्तीने त्या अधिकाऱ्याच्या कानशिलात लगावली.यानंतर एकच गोंधळ उडाला.अधिकाऱ्यांना सर्वांनी शिवीगाळ करणे सुरू केले.उपस्थित पोलिसांनी परिस्थिती आटोक्यात आणण्याचा प्रयत्न केला.मात्र त्यांना फार यश आले नाही.
बैठकीच्या खोलीतून अधिकाऱ्यांना कसेबसे बाहेर काढण्यात पोलिसांना यश आले.अधिकाऱ्यांशी चर्चा करण्याची,मागण्या ठेवण्याची एक पद्धत असते, शिष्टाचार असतो,पण यावेळी तो पाळण्यात आला नाही.खुद्द खासदारांच्या सख्ख्या भावानेच शिवीगाळ करायला सुरुवात केल्याने निकाल लागताच मुजोरी वाढल्याची चर्चा रंगू लागली आहे.दरम्यान, यासंदर्भात कर्नाटक एम्टा खाण व्यवस्थापनाचे उपाध्यक्ष जीभकाटे यांनी,यावर बोलण्यास नकार दिला.तुम्ही सांगताय तसे काही घडले नाही, असे म्हणत त्यांनी ‘आगाऊ वाद’ टाळल्याची चर्चा आहे.
