मानहानी झाली की,मनुष्य जिवंत असूनही मृत समजला जातो; वाईट माणूस चालेल,पण वाईट नाव नको.. – खोट्या गुन्ह्यात अडकवलेल्या २४ वर्षीय महिलेस शिक्षा..

रेखा आणि राजेशचे प्रेमसंबंध होते.नात्यात कटुता आल्यानंतर रेखाने राजेश व त्याचा मित्र भूपेंद्र कुमार यांच्यावर सामूहिक बलात्कार व ॲट्रॉसिटी कायद्यांतर्गत गंभीर आरोप करीत गुन्हा दाखल केला. दोन्ही आरोपींना अटक होऊन ते तीन महिने तुरुंगात राहिले.मात्र,पोलिसांनी सखोल तपास करून न्यायालयात तक्रार खोटी असल्याचा अहवाल सादर केला.रेखाने पोलिसांच्या या अहवालाला विरोध केला. त्यामुळे खटला चालविण्यात आला व न्यायालयाने राजेश व भूपेंद्र यांची निर्दोष मुक्तता तर केलीच उलट रेखाविरुद्ध कलम १८२ (लोकसेवकाला खोटी माहिती देणे) व २११ (खोटा गुन्हा दाखल करणे) अंतर्गत दोषी ठरवले.लखनौच्या विशेष न्यायालयाचे न्या.विवेकानंद शरण त्रिपाठी यांनी रेखाला साडेसात वर्षाचा तुरुंगवास व २ दोन लाख १० हजार रुपये दंडाची शिक्षा दिली.रेखाने एससी,एसटी कायद्यांतर्गत मिळवलेला मदतनिधी परत वसूल करण्याचे आदेश कोर्टाने जिल्हाधिकाऱ्यांना दिले.एससी-एसटी कायदा, पॉक्सो व इतर संवेदनशील कायद्यांचा गैरवापर केला गेला तर जनतेचा कायद्यावरील विश्वास डळमळीत होईल.असे न्यायालयाने निरीक्षण नोंदवित खोटा गुन्हा दाखल केलेल्या महिलेला दणका दिला आहे.