उद्रेक न्युज वृत्त
मुंबई :-आयपीएस अधिकारी जयंत मीना यांनी आमदार रत्नाकर गुट्टे तसेच सार्वभौम सभागृहाचा विशेषाधिकार भंग केल्याप्रकरणी मीना यांच्यावर कारवाई करण्याचा ठराव विधानसभेने काल,शुक्रवारी मंजूर केला.आमदार राहुल कूल यांच्या अध्यक्षतेखालील विशेषाधिकार समितीच्या शिफारशीनुसार विधानसभेने राज्य सरकारला शिफारस केली आहे की,मीना यांची पुढील तीन वर्षांसाठी बिगर कार्यकारी पदावर बदली करावी आणि त्यांच्या सेवापुस्तकात कारवाईची नोंद करावी.
आमदार रत्नाकर गुट्टे यांनी २०२२ मध्ये मीना यांच्याविरोधात अपमानास्पद वक्तव्य केल्याबद्दल विशेषाधिकार भंगाचा प्रस्ताव दाखल केला होता.गुट्टे यांनी परभणीच्या पोलिस अधीक्षकपदी रुजू झालेल्या मीना यांना अवैध दारूपुरवठा,जुगाराच्या अड्ड्यांबाबत तक्रार केली, तेव्हा मीना यांनी गुट्टे यांना तंबी देत ‘तुम्ही कोणत्या प्रकारे निवडून आलेले प्रतिनिधी आहात? मला माझे काम शिकवू नका,’ असे म्हणत कार्यालयातून हाकलून दिले.या प्रकरणी गुट्टे यांनी हक्कभंग दाखल केला होता.
या शिक्षेची अंमलबजावणी सुनिश्चित करण्यासाठी पोलिस महासंचालक आणि मुख्य सचिवांना शिफारस करून आवाजी मतदानाने ठराव मंजूर करण्यात आला.
