पूरग्रस्त महिलेची हक्काच्या प्लाट करीता पायपीट; ‘शासन आपल्या दारी’ उपक्रमास ठेंगा.. -कुरखेडा महसूल विभागातील बेजबाबदार कर्मचाऱ्यावर कारवाईची मागणी..

कुरखेडा(गडचिरोली):-एकीकडे शासन विविध सरकारी योजना,कागदपत्रे आणि सेवा एकाच ठिकाणी थेट नागरिकांच्या दारात उपलब्ध करून देण्यासाठी ‘शासन आपल्या दारी’ उपक्रम राबवून प्रशासनातील अडथळे दूर करून पारदर्शक,वेगवान आणि सुलभ सेवा प्रदान करण्याचा मोठा गाजावाजा करीत आहे.मात्र,काही बेजबाबदार व कामचुकार कर्मचाऱ्यांकडून शासकीय स्तरावरून सुरू असलेल्या या उपक्रमास ठेंगा दाखविण्यात येत असल्याचा प्रकार कुरखेडा तहसील कार्यालय अंतर्गत जमीन शाखेत उघडकीस आला आहे. शहरातील एका पूरग्रस्त आदिवासी समाजातील महिलेच्या मुलाच्या नावाने उपलब्ध करून देण्यात आलेल्या प्लाटसाठी शासकीय फी जमा करीत ताबा मिळविण्याकरीता मागील एक वर्षापासून कार्यालयाचे उंबरठे झिजवावे लागत असल्याने कुरखेडा महसूल विभागातील बेजबाबदार कर्मचाऱ्यावर कारवाईची मागणी कुरखेडा शिवसेना तालुका प्रमुख तथा नगरसेवक आशिष काळे यांनी केली आहे.

कुरखेडा शहराच्या सतीनदी काठावरील काही पूरग्रस्त कुटुंबांचे काही वर्षापूर्वी सुरक्षित ठिकाणी पुनर्वसन व्हावे म्हणून त्यांना सूरक्षित असलेल्या शासकीय आबादी जागेत नाममात्र दरात प्लाट उपलब्ध करून देण्यात आले.यासाठी शासकीय रकमेचा भरणा करून अनेक लाभार्थींनी प्लाटचा ताबा घेतलेला आहे.तर काही लाभार्थी वेळेवर फी न भरू शकल्याने वा अन्य कारणाने अद्याप ताबा घेऊ शकलेले नाही.यात माया निलकंठ आलाम या आदिवासी महिलेला सुद्धा त्यांच्या मृतक मुलाच्या नावाने शासकीय प्लाट उपलब्ध करून देण्यात आला आहे.तिला प्लाटचा ताबा हवा असल्याने ती कुरखेडा येथील जमीन शाखेत मागील एक वर्षापासून चकरा मारत आहे.मात्र,येथील पदस्थ सहाय्यक महसूल अधिकारी जुमनाके प्रकरण शोधतो,प्रकरण मिळत नाही, मालमत्तेचे काम काय?अश्या बाता जोडून तिला वारंवार पायपीट करण्यास भाग पाडत आहे.अश्यातच आज, सोमवार ९ मार्च रोजी लाभार्थी माया आलाम प्रकरणा संदर्भात स्थानिक शिवसेना तालुका प्रमुख तथा नगरसेवक आशिष काळे यांना सोबत घेऊन जमीन शाखेत चौकशी केली असता,सहाय्यक महसूल अधिकारी जुमनाके यांनी मला तेच काम आहे कां? तहसीलदार यांना माहीती विचारा?असे उध्दट उत्तर दिले.त्यामुळे,अशा उद्धट व कामचुकार व ‘शासन आपल्या दारी’ या उपक्रमाच्या हेतुला हरताळ फासणाऱ्या अधिकाऱ्याची चौकशी करीत कारवाई करावी व आदिवासी महिलेला न्याय देण्यात यावा,असे निवेदन आज कुरखेडा तहसीलदार यांना लाभार्थी माया आलाम यांनी दिले आहे.सदर प्रकरणाची चौकशी करीत मुजोर,कामचुकार अधिकाऱ्यावर कारवाई न झाल्यास शिवसेनेच्या  वतीने आंदोलन छेडण्यात येईल,असा इशाराही याप्रसंगी नगरसेवक आशिष काळे यांनी दिला आहे.