आपसी तडजोडीने प्रकरणे निकाली काढून लोकन्यायालयाचा लाभ घेण्याचे आवाहन..

गडचिरोली :-महाराष्ट्र राज्य विधी सेवा प्राधिकरण, मुंबई यांच्या निर्देशान्वये जिल्हा विधी सेवा प्राधिकरण, गडचिरोली यांच्या वतीने येत्या,शनिवार १४ मार्च २०२६ रोजी राष्ट्रीय लोकअदालतीचे आयोजन करण्यात आले आहे.ही लोकअदालत जिल्हा विधी सेवा प्राधिकरणाचे अध्यक्ष तथा प्रमुख जिल्हा व सत्र न्यायाधीश अनिरुद्ध टिकले यांच्या मार्गदर्शनाखाली आयोजित करण्यात येणार आहे.

जिल्हा व सत्र न्यायालय गडचिरोली व अहेरी तसेच तालुका न्यायालय अहेरी,आरमोरी,चामोर्शी,देसाईगंज, धानोरा,कुरखेडा आणि सिरोंचा येथे राष्ट्रीय लोकअदालतीचे आयोजन करण्यात येणार असून न्यायालयात प्रलंबित असलेली तडजोडीस पात्र फौजदारी प्रकरणे,दिवाणी दावे तसेच दाखलपूर्व प्रकरणे दोन्ही पक्षकारांच्या संमतीने आपसी तडजोडीद्वारे निकाली काढण्यात येणार आहेत.

राष्ट्रीय लोकअदालतीमध्ये दिवाणी व फौजदारी स्वरूपातील तडजोडीस पात्र प्रकरणे,प्ली बार्गेनिंग प्रकरणे,१३८ एन.आय.ॲक्ट अंतर्गत प्रकरणे,भूसंपादन प्रकरणे,कौटुंबिक वाद,मोटार वाहन अपघात दावा प्रकरणे,दरखास्त प्रकरणे,बँकांशी संबंधित प्रकरणे तसेच दाखलपूर्व वादांमध्ये टेलिफोन व मोबाईल कंपन्यांशी संबंधित वाद,महाराष्ट्र राज्य वीज वितरण कंपनीशी संबंधित प्रकरणे,पतसंस्थांशी संबंधित वाद,नगर परिषद व ग्रामपंचायत कर आकारणी प्रकरणे तसेच जिल्हा ग्राहक तक्रार निवारण मंचातील प्रकरणे यांचा समावेश असणार आहे.

लोकअदालतीत प्रकरणे तडजोडीसाठी ठेवतांना कोणत्याही प्रकारची न्यायालयीन फी भरावी लागत नाही.तसेच लोकअदालतीच्या निवाड्याविरुद्ध अपील करता येत नाही.लोकअदालतीत झालेला निर्णय न्यायालयाच्या हुकूमनाम्याप्रमाणे अंमलात आणता येतो.यामध्ये साक्ष-पुरावा,उलटतपासणी व दीर्घ युक्तीवादाची प्रक्रिया टाळली जात असल्याने प्रकरणांचा जलद व सोपा निपटारा होतो.शिवाय लोकअदालतीत निकाली निघालेल्या प्रकरणांमध्ये कायद्यानुसार भरलेली कोर्ट फी परत मिळण्याची तरतूद आहे.तरी येत्या,१४ मार्च २०२६ रोजी आयोजित राष्ट्रीय लोकअदालतीमध्ये पक्षकार, अधिवक्ता व नागरिकांनी मोठ्या संख्येने सहभागी होऊन आपसी तडजोडीने प्रकरणे निकाली काढून लोकन्यायालयाचा लाभ घ्यावा,असे आवाहन जिल्हा विधी सेवा प्राधिकरणाचे सचिव न्यायमूर्ती अंकुश खानोरकर यांनी केले आहे.