पंतप्रधान नरेंद्र मोदी नागपूरच्या एकदिवसीय दौऱ्यावर.. – तब्बल ८ वर्षानंतर दुसऱ्यांदा दीक्षाभूमीला देणार भेट..

नागपूर :-पंतप्रधान नरेंद्र मोदी हे येत्या रविवारी,३० मार्च रोजी नागपूरच्या एकदिवसीय दौऱ्यावर असणार आहेत.पंतप्रधान नरेंद्र मोदी यांच्या रविवार दौऱ्याच्या निमित्ताने एसपीजीचे पथक नागपुरात दाखल झाले असून,काल गुरुवारी त्यांनी सुरक्षाव्यवस्थेचा आढावा घेतला.वरिष्ठ पोलिस अधिकाऱ्यांसोबत झालेल्या चर्चेत चारही ठिकाणे तसेच दौऱ्याच्या मार्गावरील सुरक्षा बंदोबस्ताबाबत सखोल नियोजन करण्यात आले. नागपुरात मागील आठवड्यात झालेल्या हिंसाचाराच्या पार्श्वभूमीवर पंतप्रधानांच्या दौऱ्यासाठी पोलिसांनी कडेकोट पोलिस बंदोबस्त तैनात केला आहे.सुरक्षेसाठी अधिकाऱ्यांसह चार हजार पोलिस कर्मचारी तैनात करण्यात आले आहेत.बाहेरील जिल्ह्यांमधूनही १५० अधिकाऱ्यांना बोलावण्यात आले आहे.यावेळी डॉ.बाबासाहेब आंबेडकर स्मारक समिती दीक्षाभूमीतर्फे पंतप्रधानांचे स्वागत केले जाईल. डॉ.बाबासाहेब आंबेडकर लिखित बुद्ध आणि त्यांचा धम्म व गोल्डन कलरमध्ये दीक्षाभूमीची प्रतिकृती असलेले सन्मानचिन्ह पंतप्रधान मोदी यांना भेट दिले जाईल.डॉ.बाबासाहेब आंबेडकर नागपूर आंतरराष्ट्रीय विमानतळावरून ते थेट रेशीमबाग स्मृतिमंदिर परिसराकडे रवाना होतील,तेथून ते दीक्षाभूमीला जातील व त्यानंतर माधव नेत्रालयाच्या कार्यक्रमात पोहोचतील.तेथून ते सोलार एक्सप्लोझिव्हला भेट देणार आहेत व दुपारी १.३० वाजेच्या सुमारास छत्तीसगडला रवाना होणार आहेत.

पंतप्रधान मोदी हे तब्बल ८ वर्षानंतर दुसऱ्यांदा दीक्षाभूमीला भेट देणार आहेत.यावेळी ते जवळपास १५ मिनिटे दीक्षाभूमीवर राहतील.यापूर्वी मोदी जेव्हा दीक्षाभूमीवर आले होते तेव्हा त्यांनी मध्यवर्ती स्तुपामध्ये पाच मिनिटे ध्यानसाधना केली होती.त्यामुळे यंदाही पंतप्रधानांच्या ध्यानसाधनेसाठी स्तुपामध्ये विशेष बैठक व्यवस्था करण्यात आली आहे.१४ एप्रिल २०१७ मध्ये डॉ.बाबासाहेब आंबेडकर यांच्या १२६ व्या जयंतीनिमित्त पंतप्रधान नरेंद्र मोदी यांनी दीक्षाभूमीला भेट दिली होती.त्यावेळी ते नागपुरात जवळपास साडेतीन तास थांबले होते तर दीक्षाभूमीवर त्यांनी तब्बल २० मिनिटे घालवली होती.त्यावेळी त्यांनी मध्यवर्ती स्मारकामध्ये ध्यानसाधनाही केली होती.