नितीन गडकरींच्या घराला बॉम्बने उडवून देण्याची धमकी देणाऱ्यास अटक..!

नागपूर :-केंद्रीय रस्ते वाहतूक मंत्री नितीन गडकरी यांच्या नागपुरातील महाल परिसरातील निवास्थनास बॉम्बने उडवण्याची धमकी आज,रविवार ३ ऑगस्ट रोजी सकाळी पावणे नऊच्या सुमारास देण्यात आल्याने पोलीस यंत्रणांची एकच तारांबळ उडाली.सदरचा कॉल हा ११२ इमर्जन्सी हेल्पलाइन क्रमांकावर करण्यात आला होता.त्यात गडकरींच्या घरात बॉम्ब असल्याचे सांगितले गेले आणि घर बॉम्बने उडविण्यात येणार,असे सांगितल्या गेले असल्याचे झोन १ चे पोलिस उपायुक्त ऋषिकेश रेड्डी यांनी सांगितले.त्यानुसार तात्काळ गडकरींच्या सुरक्षारक्षकांना आणि बॉम्ब शोध पथकाला सतर्क करण्यात आले.धमकीच्या कॉलनंतर पोलिसांनी स्थानिक पोलिस ठाण्याला आणि बॉम्ब शोध पथकाला तत्काळ माहिती दिली. गडकरी यांच्या निवासस्थानी कसून तपासणी करण्यात आली, मात्र कोणताही स्फोटक पदार्थ आढळला नाही.त्यामुळे हा कॉल खोटा असल्याचे स्पष्ट झाले.धमकीच्या फोननंतर पोलिसांनी तत्काळ पावले उचलत आरोपीला ताब्यात घेतले आहे.उमेश विष्णु राऊत रा. तुलसीबाग रोड,महाल,नागपूर या संशयिताने गडकरींच्या घराला बॉम्बने उडवण्याचा फोन केला होता.तो मेडिकल चौकाजवळील एका देशी दारूच्या दुकानात काम करतो.त्याने मोबाईलवरून कॉल करून १० मिनिटांत गडकरींचे घर उडवून देण्याची धमकी दिली होती.पोलिसांनी बीमा रुग्णालयाजवळून त्याला ताब्यात घेतले. यापूर्वी मंत्री नितीन गडकरी यांच्या जनसंपर्क कार्यालयात अशाच प्रकारचे धमकीचे ईमेल आले होते.त्यानंतर कर्नाटकमधून एका उमेश काथा नामक कुख्यात आरोपीला अटक करण्यात आली होती.