उद्रेक न्युज वृत्त
गोंदिया :- तुमच्या हॉटेलात एका मुलीचा अश्लील व्हिडीओ तयार केला असून गुन्ह्याच्या चार्जशीटमधून नाव कमी करण्यासाठी ६० हजार रुपयांची मागणी केली होती.घाबरून हॉटेल मालकाने ६० हजार रुपये फोन पेवरून दिले.त्याची तक्रार पोलिसांत केली.पोलिसांनी दोघांना चंद्रपूर आणि गडचिरोली जिल्ह्यातून अटक केली.चंदन दिगुराम सांगरे वय २८ वर्षे,रा.आष्टी जि. गडचिरोली आणि रवी मारोती मंचावार वय ५३ वर्षे, रा.दाताडा रोड,चंद्रपूर अशी आरोपींची नावे आहेत.
शहरातील गांधी चौक परिसरातील हॉटेल राइस सिटीचे मालक गोपाल प्रल्हादराय अग्रवाल यांना अज्ञात व्यक्तीने ४ नोव्हेंबर रोजी फोन केला. तुमच्या हॉटेलमध्ये एका मुलीचा अश्लील व्हिडीयो तयार केला असून त्यात तुमचे नाव येत असल्याची भीती दाखविली.गुन्ह्याच्या चार्जशीटमधून त्यांचे नाव कमी करण्यासाठी पोलिस प्रोसेक्युटरला देण्याकरिता ६० हजार रुपये पाठवा,असे सांगितले.गोपाल अग्रवाल यांनी घाबरून गुन्हा दाखल नसताना सुद्धा अनोळखी व्यक्तीच्या मोबाइलवर ६० हजार रुपये पाठविले.यासंदर्भात गोपाल अग्रवाल यांनी ६ नोव्हेंबर रोजी शहर पोलिस ठाण्यात तक्रार दाखल केली होती. गोंदियाचे पोलिस अधीक्षक निखिल पिंगळे,अप्पर पोलिस अधीक्षक अशोक बनकर यांनी दिलेल्या सूचनेनुसार उपविभागीय पोलिस अधिकारी सुनील ताजने यांच्या मार्गदर्शखाली पोलिस निरीक्षक चंद्रकांत सूर्यवंशी यांनी तपास सुरू केला.ज्या खात्यात पैसे टाकण्यात आले त्यावरून तपशील गोळा करण्यात आला.पथकांना गडचिरोली आणि चंद्रपूर येथे रवाना करण्यात आले.आरोपी चंदन दिगुराम सांगरे रा. जयगुरूनगर,आष्टी,ता.चामोर्शी,जि.गडचिरोली आणि रवी मारोती मंचावार,रा.दाताडारोड,चंद्रपूर या दोघांना अटक केली.इतर जिल्ह्यातदेखील आपण हॉटेल चालकांची फसवणूक केल्याची कबुली आरोपींनी दिली.
