उद्रेक न्युज वृत्त
कुरखेडा(गडचिरोली) :- नववीच्या वर्गात शिकणाऱ्या मुलीचा शाळेत जातांना पाठलाग करुन ‘आय लव्ह यू’ म्हणत छेड काढणाऱ्या दोन तरुणांना काल १२ सप्टेंबर २०२३ रोजी कुरखेडा पोलिसांनी जेरबंद केले.सदर घटना लज्जास्पद असल्याने आरोपींना न्यायालयीन कोठडी सुनावल्याने त्यांची रवानगी कारागृहात करण्यात आली आहे.
वैभव जांभुळकर वय २२ वर्षे व रेवननाथ दूधकुंवर वय २२वर्षे दोघेही कुरखेडा तालुक्यापासून काही अंतरावर असलेल्या रा.आंधळी नवरगाव येथील रहिवाशी आरोपींची नावे आहेत.पोलिस प्रशासनाच्या माहितीनुसार,पीडित मुलगी नववीत शिकते. शाळेत जातांना आरोपी तरुण तिचा दुचाकीवरुन पाठलाग करून ‘आम्ही प्रेम करतो; तू सुध्दा प्रेम कर’… असे म्हणत ते तिची छेड काढायचे.सुरवातीला मुलीने दुर्लक्ष केले; पण रोजच त्रास सुरु झाल्याने तिने मन घट्ट करुन कुटुंबाला आपबिती सांगितली व १२ सप्टेंबरला कुरखेडा ठाण्यात फिर्याद दिली.
फिर्याद दिल्यानंतर विनयभंग व बाललैंगिक अत्याचाराच्या कलमान्वये गुन्हा नोंद झाल्यावर कुरखेडा ठाण्याचे पोलिस निरीक्षक संदीप पाटील यांच्या मार्गदर्शनाखाली सहाय्यक निरीक्षक दिनेश गावंडे यांनी दोघांनाही अटक केली. न्यायालयाने त्यांना न्यायालयीन कोठडी सुनावली व त्यानंतर त्यांची रवानगी कारागृहात झाली असल्याची माहिती पोलीस निरीक्षक पाटील यांनी दिली आहे.
