देसाईगंज शहरात आमदार रामदास मसराम यांच्या हस्ते विविध विकास कामांचे भूमिपूजन..

देसाईगंज(गडचिरोली):-देसाईगंज शहराच्या सर्वांगीण विकासाला चालना देण्यासाठी आमदार रामदास मसराम यांच्या स्थानिक विकास निधीतून आज,शनिवार २७ डिसेंबर रोजी शहरात विविध विकास कामांचे भूमिपूजन करण्यात आले.देसाईगंज येथील हनुमान वार्डातील राष्ट्रसंत तुकडोजी महाराज मंदिर परिसरात गट्टू बांधकाम तसेच हनुमान वार्डात सिमेंट-काँक्रिट रोड बांधकाम या दोन कामांचा शुभारंभ आमदार रामदास मसराम यांच्या हस्ते पार पडला.या कामांमुळे मंदिर परिसराचा कायापालट होणार असून नागरिकांना स्वच्छ,सुरक्षित व सुकर वाहतुकीची सुविधा उपलब्ध होणार आहे. पावसाळ्यात परिसरात साचणारे पाणी व चिखलाची समस्या दूर होऊन भाविकांसह स्थानिक नागरिकांना मोठा दिलासा मिळणार आहे.हनुमान वार्डातील सिमेंट -काँक्रिट रोड बांधकामामुळे दळणवळण अधिक गतिमान होणार असून परिसरातील स्थानिक नागरिकांना दैनंदिन वापरासाठी सोयीचा रस्ता उपलब्ध होणार आहे.

भूमिपूजन प्रसंगी आमदार रामदास मसराम यांनी सांगितले की, “देसाईगंज शहरातील प्रत्येक प्रभागाचा समतोल व दर्जेदार विकास करण्याचा ध्यास असून नागरिकांच्या गरजा लक्षात घेता स्थानिक विकास निधीतून आवश्यक ती सर्व विकास कामे मंजूर करण्यात येत आहेत.भविष्यात देसाईगंजच्या विकासासाठी निधी कमी पडू दिला जाणार नाही.”

कामांचे भूमिपूजन करतेवेळी माजी नगराध्यक्ष शालूताई दंडवते,देसाईगंज नगरपरिषदेचे नवनिर्वाचित नगरसेवक विकास प्रधान,नगरसेवक श्याम उईके,नगरसेविका राधिका पत्रे,नगरसेविका गुरमीतकौर चावला,नगरसेविका आश्या दहिवले,नगरसेविका फैमिदा पठाण,नगरसेविका मंदा समर्थ,कांग्रेस नेत्या वनिता नाकतोडे तसेच सर्व तुकडोजी महाराज मंदिराचे अधक्ष,उपाध्यक्ष,सचिव, सामाजिक कार्यकर्ते तसेच मोठ्या संख्येने नागरिक उपस्थित होते.