देसाईगंज शहरातील कोट्यवधी रुपयांचा स्विमिंग पूल बंद स्वरूपात; नगर परिषद प्रशासन निद्रावस्थेत..

देसाईगंज(गडचिरोली):-शहरातील कोट्यवधी रुपये खर्चून बांधलेला अत्याधुनिक स्विमिंग पूल गेल्या अनेक वर्षांपासून बंद स्वरूपात असून धूळखात पडला आहे.उन्हाळ्याच्या तीव्र उष्णतेत सुरक्षित जलतरण सुविधा उपलब्ध नसल्याने तरुण जीव धोक्यात घालून वैनगंगा नदी पात्राकडे स्विमिंगसाठी (पोहणे) धाव घेत असल्याने नगर परिषद प्रशासन चुप्पी साधून निद्रावस्थेत गेले की काय? असा प्रश्न निर्माण झाला आहे.

देसाईगंजमध्ये सुरक्षित जलतरण सुविधा उपलब्ध असतांनाही ती नागरिकांना वापरता येत नाही,हे प्रशासनाच्या बेफिकिरीचे उत्तम उदाहरण आहे. स्विमिंग पूल बंद असल्यामुळे शेकडो तरुणांना दररोज खोल नदीत पोहण्याचा धोका पत्करावा लागत आहे.त्यामुळे अनेकांच्या जीवितास धोका निर्माण होऊ लागला आहे.

शहरातील तरुणांच्या सुरक्षिततेचा विचार करून काँग्रेस युवा नेते पिंकूभाऊ बावणे यांनी प्रसिद्धी पत्रकाद्वारे प्रशासनाला धारेवर धरित स्विमिंग पूल त्वरित सुरू करण्याची मागणी केली आहे.प्रशासनाने तातडीने निर्णय घेतला नाही,तर याबाबत तीव्र आंदोलन छेडले जाईल,असा इशारा त्यांनी दिला आहे.

प्रशासनाने वेळकाढूपणा केला,तर काँग्रेसच्या नेतृत्वाखाली मोठे जनआंदोलन उभारण्यात येईल, असे स्पष्ट संकेत देण्यात आले आहेत.