उद्रेक न्युज वृत्त
दिल्ली :- दिल्लीचे मुख्यमंत्री अरविंद केजरीवाल यांना सुप्रीम कोर्टाकडून अखेर अंतरिम जामीन मंजूर करण्यात आला आहे.सुप्रीम कोर्टाने केजरीवालांना १ जूनपर्यंत अंतरिम जामीन मंजूर केला आहे.सुप्रीम कोर्टाच्या दोन न्यायाधीशांच्या पीठाने आज शुक्रवारी जामीन मंजूर केला.त्यांनी २ जूनला पुन्हा स्वतः न्यायालयासमोर हजर व्हावे; असे कोर्टाने म्हटले आहे.
केजरीवाल यांना निवडणुकीत प्रचार करता यावा; म्हणून कोर्टाने हा निर्णय दिला आहे.२१ मार्चपासून केजरीवाल ईडीच्या कोठडीत आहेत.”ही अटक आधी किंवा नंतर व्हायला हवी होती.आता आम्ही २१ दिवस देत आहोत, “असे जस्टीस संजीव खन्ना म्हणाले.
केजरीवाल यांनी अटकेला आव्हान देणारी याचिका केली आहे.त्यासह या प्रकरणावरची सुनावणीही लवकरच पूर्ण करणार असल्याचेही न्यायालयाने म्हटले आहे.अद्याप निकालाची कॉपी मिळालेली नसल्याने या जामीनाच्या आणखी काय अटी असतील हे समोर आलेले नाही.यापूर्वी झालेल्या सुनावणीत केजरीवालांच्या जामीन आर्जाला ईडीने विरोध केला होता.निवडणुकीचा प्रचार करणे हा मूलभूत अधिकार नाही किंवा घटनात्मक अधिकारही नाही,असे ईडीने गुरुवारी म्हटले होते.
जस्टिस संजीव खन्ना यांच्या पीठाने केजरीवाल यांच्या याचिकेवर सुनावणी करताना आज,शुक्रवारी निर्णय देणार असे स्पष्ट केले होते.अरविंद केजरीवाल यांना २१ मार्चला दिल्लीच्या मद्यधोरण प्रकरणात अटक करण्यात आली होती. त्यानंतर आता केजरीवालांना जामीन मंजूर करण्यात आला आहे.
