डॉक्युमेंट्री स्पर्धेत मंगेश जनबंधू नागपूर विभागातून द्वितीय..

देसाईगंज(गडचिरोली):-राज्य शैक्षणिक संशोधन व प्रशिक्षण परिषद पुणे यांच्यावतीने राज्यातील शिक्षक व शिक्षकेत्तर कर्मचाऱ्यांसाठी आयोजित करण्यात आलेल्या विविध सर्जनशील स्पर्धांमध्ये भिवापूर एज्युकेशन सोसायटी गर्ल्स हायस्कूलचे सहाय्यक शिक्षक मंगेश जनबंधू यांनी उल्लेखनीय यश संपादन केले आहे.

नागपूर विभागातील स्पर्धकांमधून त्यांच्या ‘शिक्षण बदलतंय..?’ या माहितीपटाला(डॉक्युमेंट्री)द्वितीय क्रमांक प्राप्त झाला असून सदर माहितीपटातून शैक्षणिक क्षेत्रातील बदलांचे वास्तवदर्शी चित्रण करीत अनेक विचारप्रवर्तक प्रश्न उपस्थित करण्यात आले आहेत.सर्व विभागांतील विजेत्यांचे माहितीपट राज्यस्तरीय पुनर्परीक्षणासाठी पाठविण्यात येणार असून त्यातून अंतिम राज्यस्तरीय विजेते घोषित केले जाणार आहेत. मंगेश जनबंधू यांचे हे यश त्यांच्या सर्जनशीलतेचे आणि शिक्षणाविषयीच्या तळमळीचे उत्तम उदाहरण ठरत आहे.याआधीही त्यांनी कव्हर साँग,अल्बम साँग,तसेच विविध माहितीपटांचे दिग्दर्शन व संपादन यासारखी उल्लेखनीय कामे केली आहेत. सध्या ते भिवापुरी मिरची या नवीन डॉक्युमेंट्रीच्या एडिटिंगवर कार्य करीत आहेत. मंगेश जनबंधू हे साहित्यिक तथा गझलकार म्हणूनही सुपरिचित आहेत.त्यांच्या या यशाबद्दल शाळेचे मुख्याध्यापक हुलके तसेच सर्व शिक्षकवृंद व शिक्षण विभागातील कर्मचाऱ्यांनी अभिनंदनाचा वर्षाव करत पुढील वाटचालीस शुभेच्छा दिल्या.