जागतिक स्तरावर युद्धाचा भडका; सोने-चांदीच्या दराने उच्चांक गाठला..

नागपूर :-जागतिक स्तरावरील युद्धाच्या भडक्याने जीवनावश्यक वस्तूंसह विविध बाबींवर येत्या काही दिवसांत मोठा परिणाम पडणार आहे.कोणत्या वस्तू महागणार हे सांगणे अवघड आहे.तत्पूर्वी युद्धाचा थेट परिणाम भारतासह स्थानिक सराफा बाजारावर पडलेला दिसून येत आहे.सुरक्षित गुंतवणूक म्हणून सोन्याकडे पाहणाऱ्या गुंतवणूकदारांच्या वाढत्या मागणीमुळे आणि आंतरराष्ट्रीय घडामोडींमुळे सोने-चांदीच्या किमतींनी पुन्हा नवा उच्चांक गाठला आहे. शनिवारच्या तुलनेत सोमवारी २४ कॅरेट सोने ३ हजार ३०० रुपयांनी वाढून १ लाख ७२ हजार रुपये,तर चांदीत ६ हजार ९०० रुपयांची वाढ होऊन २ लाख ९५ हजार ८०० रुपयांवर पोहोचली आहे. अवघ्या दोन दिवसांत झालेल्या या प्रचंड दरवाढीमुळे सर्वसामान्यांच्या खिशाला कात्री लागल्याने ग्राहकांनी सध्या दागिने खरेदीकडे पाठ फिरविल्याचे दिसून येत आहे.विशेष बाब म्हणजे,दरवाढीमुळे सोने-चांदीच्या दुकानांमध्ये शुकशुकाट पाहायला मिळत आहे.त्यातच, केवळ अत्यंत गरजच भासली तर काही प्रमाणात खरेदी होत असल्याचे चित्र आहे.