जमीन गैव्यवहारप्रकरणी तहसीलदारासह दुय्यम निबंधक निलंबित; मुख्यमंत्र्यांची थेट कारवाई..

मुंबई :-पुण्यातील कोरेगाव पार्क परिसरातील ४० एकर मोक्याची जमीन केवळ ३०० कोटी रुपयांमध्ये विकल्याचा आणि त्यासाठी केवळ ५०० रुपयांची स्टँप ड्युटी आकारण्यात आल्याचा गंभीर प्रकार उघडकीस आला आहे.सदरची जमीन सुमारे १८०० कोटी रुपयांची असल्याचा दावा करण्यात आला आहे.प्रकरणी उपमुख्यमंत्री अजित पवार यांचे सुपुत्र पार्थ पवार यांच्या मालकीच्या कंपनीचा सहभाग असल्याचे समोर आल्यानंतर राज्याच्या राजकारणात मोठी खळबळ उडाली आहे.विरोधकांनीही सरकारवर टीकास्त्र डागले आहे.या प्रकरणी मुख्यमंत्री देवेंद्र फडणवीस यांनी तातडीने चौकशीचे आदेश दिले असून राज्याचे अतिरिक्त मुख्य सचिव विकास खारगे यांच्या अध्यक्षतेखाली चौकशी समिती स्थापन करण्यात आली आहे.प्राथमिक चौकशीतील गैरव्यवहाराच्या आरोपांमध्ये, ‘महाराष्ट्र नागरी सेवा (वर्तणूक)नियम १९७९’ मधील नियम ३ चे उल्लंघन केल्याचा ठपका ठेवत,पुणे शहरचे तहसीलदार सूर्यकांत येवले यांचे आज,गुरुवार ६ नोव्हेंबरला तातडीने निलंबन करण्यात आले आहे.त्यांच्यावर विभागीय चौकशीचेही आदेश देण्यात आले आहेत.जमिनीची नोंदणी बेकायदेशीर असल्याचा दावा केला जात असल्याने मुद्रांक शुल्क विभागानेही स्वतंत्र चौकशी सुरू केली आहे.यासाठी पाच सदस्यीय समिती स्थापन करण्यात आली आहे. या कारवाईचा भाग म्हणून हवेली क्रमांक-३ चे दुय्यम निबंधक रवींद्र तारू यांनाही तात्काळ निलंबित करण्यात आले आहे. त्यातच मुख्यमंत्री देवेंद्र फडणवीस यांनी महसूल विभाग, आयजीआर आणि भूमी अभिलेख विभाग(लँड रेकॉर्ड्स) यांच्याकडून या व्यवहाराची संपूर्ण माहिती मागवली असून योग्य चौकशीचे आदेश दिले आहेत.