जखमी युवकाचा तीन दिवसांनी उपचारादरम्यान मृत्यू.. – देसाईगंजहून कुरखेडा जात असतांना घडला होता अपघात..

कुरखेडा(गडचिरोली) :-कुरखेडा तालुक्याच्या गोठणगाव येथील २१ वर्षीय युवकाचा देसाईगंजहून दुचाकीवरून कुरखेडाकडे जात असतांना वाटेत नान्ही फाट्या नजिक बुधवारी १२ फेब्रुवारीला शेतातून चिखलणी करून परतणाऱ्या ट्रॅक्टरने त्याच्या दुचाकीला धडक दिली होती.यात मयूर देवराव घुगुसकर वय २१ वर्षे,रा.गोठणगाव,ता.कुरखेडा नामक युवक गंभीर जखमी होऊन त्याच्या डोक्याला मार लागला होता.त्यानुसार त्याला तातडीने कुरखेडा उपजिल्हा रुग्णालयात दाखल करण्यात आले होते. उपजिल्हा रुग्णालयात प्रथमोपचारानंतर त्यास नागपूर येथील खासगी रुग्णालयात हलविण्यात आले होते. नागपूरच्या रुग्णालयात उपचार सुरू असतांना काल शनिवार १५ फेब्रुवारीला दुपारी २ वाजता त्याची प्राणज्योत मावळली.मयूरच्या दोन बहिणी,आई-वडील असा आप्तपरिवार आहे.मयूरच्या मृत्यूने गावात हळहळ व्यक्त केली जात आहे.