फटाके तयार करणाऱ्या कारखान्यात स्फोट; दोन कामगारांचा मृत्यू तर तीन कामगार जखमी…

नागपूर :-नागपूर-काटोल मार्गावरील कोतवालबर्डी स्थित एशियन फायर वर्क्स या फटाके तयार करणाऱ्या कारखान्यात आज,रविवार १६ फेब्रुवारीच्या दुपारी १.३० ते २ वाजेच्या सुमारास भीषण स्फोट होऊन स्फोटात दोन कामगारांचा मृत्यू तर तीन कामगार जखमी झाल्याची घटना उघडकीस आली आहे.नागपूर जिल्ह्याच्या कळमेश्वर तालुक्याच्या नागपूर-काटोल रोडवरील कोतवालबर्डी येथे ही फटाके निर्मिती करणारा कारखाना आहे.फटाके निर्मिती करणाऱ्या कारखान्यात फटाक्यांच्या कव्हर मध्ये बारुद भरुन त्याचे फटाके तयार करण्याचे काम सुरू असतांना दुपारच्या सुमारास भीषण स्फोट झाला. स्फोटात दोन कामगारांचा जागीच मृत्यू झाला.तर घटनेत तीन कामगार जखमी झाले आहेत. जखमी कामगारांना सुरुवातीला स्थानिक रुग्णालयात व नंतर नागपुरात दाखल करण्यात आले आहे.या प्रकरणी कळमेश्वर पोलीस अधिक तपास करीत असून दोन जणांचा मृत्यू झाल्याची माहिती नागपूर जिल्हा ग्रामीण पोलीसचे अधीक्षक हर्ष पोद्दार यांनी दिली.या घटनेची माहिती मिळताच कळमेश्वर,काटोल नगरपालिकांतून फायर ब्रिगेडच्या गाड्या बोलवण्यात आल्या.ॲम्बुलन्स देखील घटनास्थळावर तैनात करण्यात आल्या.या स्फोटामागचे नेमके कारण काय? यासंदर्भात स्थानिक प्रशासनाने चौकशी सुरू केली आहे.या घटनेत मृत्यू झालेले दोघेही मध्यप्रदेशच्या शिवनी येथील रहिवाशी असल्याची माहिती आहे.घटनेतील दोन गंभीर जखमींना पुढील उपचारासाठी नागपूरला पाठविण्यात आले आहे.एशियन फायर वर्कच्या मिल बॉल युनिटमध्ये दुपारी हा स्फोट झाला.त्यावेळी तिथे सात ते आठ जण काम करत होते.तर स्फोटाच्या वेळेला कंपनीत ३१ जण काम करत होते.दरम्यान कंपनीच्या मिल बॉल युनिटमध्ये फटाक्याची वात बनवण्याचे काम करण्यात येत होते,त्यावेळी हा स्फोट झाला असल्याचे सांगितले जाते.स्फोटानंतर कारखान्यात आग लागली होती,मात्र ती आटोक्यात आली आहे.