चार वाहनांना धडक देत तब्बल २० विद्यार्थ्यांना चिरडणार इतक्यात..मोठा अनर्थ टळला..!

गोंदिया :-जिल्ह्याच्या सालेकसा शहरातील बसस्थानकावर चित्तथरारक घटना समोर आली आहे.सरळ मार्गावरून जाणाऱ्या ट्रक चालकाचे ट्रक वरील नियंत्रण सुटल्याने धाडधाड करत रस्त्याच्या बाजूला असलेल्या चार वाहनांना धडक देत तब्बल २० विद्यार्थ्यांना चिरडणार इतक्यात प्रसंगावधान राखत विद्यार्थी साईडला झाल्याने थोडक्यात बचावले. अश्यातही ट्रक पुढे सरकत रस्ता दुभाजकावर जाऊन थांबला.यात जीवितहानी टळून मोठा अपघात होता होता अनेकजण बचावल्याची घटना काल गुरुवारी सकाळच्या सुमारास घडली.

विद्यार्थ्यांची शाळेत जाण्याची लगबग सुरू होती. विद्यार्थ्यांनी सालेकसा बसस्थानक गाठले.यावेळी सुमारे २० विद्यार्थी बसची प्रतीक्षा करीत रस्त्याच्या कडेला उभे होते.त्याचप्रकारे चाकरमाने तसेच व्यापारी आणि शेतकरीदेखील गोंदिया आणि आमगावला जाण्यासाठी सकाळी ९.३० वाजताच्या सुमारास उभे होते.अशातच दर्रेकसाच्या दिशेने आमगावकडे जाणारा एमएच-४० वाय-५५९७ क्रमांकाचा ट्रक भरधाव आला.त्या ट्रकने धाडधाड तब्बल चार वाहनांना धडक दिली.त्यानंतर चक्क उभे असलेले विद्यार्थी आणि प्रवाशांच्या दिशेने ट्रक गेला. परिस्थितीचे भान राखूत विद्यार्थी आणि प्रवासी तेथून पळाले.त्यामुळे त्यांचा जीव वाचला.ट्रकचालकाचा थरार एवढ्यावरच थांबला नाही,तर चालकाने ट्रक चक्क रस्ता दुभाजकावर चढविला.सुमारे १० मीटरपर्यंत ट्रक दुभाजकावरून चालत होते.हा सर्व प्रकार पाहून तेथे उपस्थित नागरिकांनी त्या ट्रकचालकाला थांबवून चांगलाच चोप दिला. पोलिसांना माहिती मिळताच चालकाला ताब्यात घेत ट्रक जप्त करण्यात आला.