घरून गेला तो परातलाच नाही; राशन दुकानदाराचा तलावात आढळला मृतदेह..!

गोंदिया :-कुठल्यातरी कारणावरून गुरुवार ७ ऑगस्ट रोजी सायंकाळच्या सुमारास घरी कुणालाही काहीही न सांगता निघून गेलेल्या एका २९ वर्षीय तरुण राशन दुकानदाराचा दुसऱ्या दिवशी शहराच्या तलावात चक्क मृतदेह आढळून आल्याने एकच खळबळ उडाली.सारंग पुरुषोत्तम देशपांडे वय २९ वर्षे रा.देवरी शहर,जि.गोंदिया असे तलावात मृतदेह आढळलेल्या तरुणाचे नाव असून सारंगचे शहरातच स्वस्त धान्याचे दुकान आहे.मृतदेह आढळताच तर्कवितर्क लावण्यात आले.सारंगला दोन भावंडे असून तो आई व भावंडांसह देवरी तहसील कार्यालय समोरील परिसरात राहत होता.सारंग हा गुरुवारच्या सायंकाळी अचानकपणे घरून निघून गेला होता.रात्र होऊनही घरी परतला नसल्याने कुटूंबीय चिंतेत होते.अश्यातच काल शुक्रवारी सकाळच्या सुमारास देवरी शहराच्या धुकेश्वरी मंदिराजवळील पवन तलावाच्या पाण्यावर काही नागरिकांना मृतदेह तरंगताना दिसून आला.सदरची बातमी शहरात वाऱ्यासारखी पसरताच घटनास्थळी नागरिकांनी एकच गर्दी केली.त्यानुसार घटनेची माहिती देवरी पोलिसांना देण्यात आली. पोलिसांनी स्थानिक मासेमारांच्या मदतीने सारंगचा मृतदेह बाहेर काढून उत्तरीय तपासणीसाठी देवरी ग्रामीण रुग्णालयात पाठविला.सारंगच्या शरीरावर कुठल्याही जखमा आढळून न आल्याने तसेच शवविच्छेदन अहवालात पाण्यात बुडून मृत्यू झाल्याचे निष्पन्न झाल्याने लावण्यात येणाऱ्या तर्कवितर्क तर्कवितर्कांना पूर्ण विराम मिळाला.