कोंढाळा रेती घाटातून रात्रीच्या सुमारास सुरू झालाय अवैध रेतीचा खेळ..!

देसाईगंज(गडचिरोली):-देसाईगंज तालुक्याच्या कोंढाळा वैनगंगा नदी रेती घाटातून रात्रीच्या सुमारास अवैध रेतीचा खेळ सुरू झाला आहे.विशेष म्हणजे,रेती तस्कर बाहेर गावातील असल्याची खात्रीशीर माहिती आहे.सध्या रेतीला सोन्याचे भाव असल्याने रेती तस्करांसाठी मध्यरात्रीचा काळ हा शुभ मानला जातो आहे.यापूर्वी काही रेती तस्कर ऐकण्याच्या मनःस्थितीत नसल्याने चक्क कुरखेडा उपविभागीय पोलिस अधिकारी (एसडीपीओ)यांनी शनिवार १९ जुलै २०२५ च्या मध्यरात्री अवैध रेती उत्खनन व वाहतूक प्रकरणी मोठी कारवाई केल्याने रेती तस्करांचे धाबे दणाणले होते.धडक कारवाईत एकूण ३६ लाख ७७ हजाराचा मुद्देमाल जप्त करून सहा आरोपींना अटक केली होती.अश्यातच परत पुन्हा अवैध रेतीचा खेळ सुरू झाल्याने याचे नवल वाटत आहे.

सध्या पावसाळा सुरू असल्याने राज्यातील लिलाव झालेले संपूर्ण रेती घाट काही कालावधीसाठी बंद स्थितीत आहेत.अश्यातही काही ठिकाणी बांधकामे सुरू असल्याने रेतीची मागणी वाढली आहे.देसाईगंज येथे एक ब्रास रेतीसाठी ७ हजार रुपये मोजावे लागत आहेत, तर गाव खेड्यात ४ हजार रुपये.सदरचे दर हे रेती तस्करांसाठी सुगीचे ठरले आहेत.त्यामुळे दुसऱ्यांचे नाव पुढे करून स्वतः च माल सुतावो,अशी भूमिका रेती तस्करांनी घेतली आहे.त्यातच काहीजण “चोरी तर चोरी वरून शिनाजोरी” करून दादागिरी करू पाहू लागल्याने अश्यांवर तात्काळ आळा घालणे गरजेचे झाले आहे.