कोंढाळा येथे सामूहिक वनहक्क प्राप्त ग्रामसभा अंतर्गत रक्षाबंधनपर कार्यक्रम…

कोंढाळा(देसाईगंज) :-देसाईगंज तालुक्याच्या कोंढाळा येथे सामूहिक वनहक्क प्राप्त क्षेत्र २५३.२५ हे.आर.मधील पटाची दान या ठिकाणी सामूहिक वनहक्क प्राप्त ग्रामसभा अंतर्गत वनांचे संरक्षण, संवर्धन व संगोपन करण्यासाठी आणि तयार केलेल्या व्यवस्थापन आराखड्यास प्रत्यक्ष कृतीत आणण्यासाठी आज,सोमवार दिनांक-१९ ऑगस्ट रोजी सकाळी ११ वाजेच्या सुमारास रक्षाबंधनपर कार्यक्रम पार पडला.

सदर कार्यक्रमास देसाईगंज तहसील कार्यालयाचे नायब तहसीलदार मुनेश्र्वर गेडाम,सृष्टी संस्था (येरंडी, ता.कुरखेडा)चे संयोजक तथा मार्गदर्शक केशव गुरूनुले यांनी प्रमुख उपस्थिती दर्शविली होती. गावातील पटाची दान येथे सामूहिक वनहक्क दाव्यांच्या माध्यमातून गावातील लोकांना रोजगार, वनउपज संपत्तीचे जतन,नियोजन आराखड्याच्या माध्यमातून भविष्यातील तरतूद अश्या अनेक विषयांवर मार्गदर्शन करून रक्षाबंधन दिनाचे औचित्य साधून वृक्षांना गावातील उपस्थित मान्यवरांच्या हस्ते राखी बांधण्यात आले.वृक्षांना राखी बांधण्यामागचा प्रमुख उद्देश म्हणजे,ज्या प्रमाणे रक्षाबंधनाच्या दिवशी आपली बहीण भावाला ओवाळणी घालून रक्षारुपी धागा बांधून रक्षणासाठी मागणी करते; तशाच प्रकारे आपणही सर्वजण मिळून वृक्षांची रक्षा करून वचनबध्द होणे तितकेच महत्त्वाचे असल्याचे कार्यक्रम प्रसंगी लक्षात येते.

आयोजित कार्यक्रम प्रसंगी ग्रामपंचायतीच्या सरपंचा अपर्णा राऊत,देसाईगंज तहसीलचे नायब तहसीलदार मुनेश्र्वर गेडाम,सृष्टी संस्थेचे संयोजक केशव गुरूनुले,देसाईगंज पंचायत समितीचे माजी उपसभापती नितीन राऊत,सृष्टी संस्थेचे राकेश खेवले,सामूहिक वनहक्क समितीचे अध्यक्ष प्रीतम रायशीडाम,शाळा व्यवस्थापन समितीचे अध्यक्ष सुनील पारधी,सामूहिक वनहक्क समितीचे सदस्य कुलदीप मेश्राम,रजनी भजनकर,रोहिणी ठाकरे,ग्रामपंचायत सदस्य प्रफुल मेश्राम,ग्रामरोजगार सेवक प्रकाश बेदरे,वैष्णवी वांढरे,दिव्या बुराडे,किरण पारधी,किरण चंद्रवंशी,ग्रामपंचायत कर्मचारी अजय भर्रे,प्रवीणकुमार शेंडे,बुराडे आजी,चंद्रकला दुपारे आदी ग्रामस्थांनी उपस्थिती दर्शविली होती.