कैद्यांना मद्य पार्टीसाठी ‘व्हीआयपी’ सेवा देणे भोवले.. – तब्बल ११ पोलीस कर्मचारी निलंबित तर दोन पोलिसांना घरचा रस्ता..

उद्रेक न्युज वृत्त :-सात कैद्यांची तब्बेत बरी वाटत नसल्याने पोलिसांनी त्यांना औषधोपचारासाठी रुग्णालयात नेले.रुग्णालयात तर नेले मात्र,काही कैद्यांना रुग्णालयातून चक्क मद्य पार्टीसाठी तसेच हॉटेलात जेवणासाठी आणि मौजमजेसाठी नेत ‘व्हीआयपी’ सेवा पुरविल्याची बाब पोलीस तपासात उघड झाल्याने पोलिस आयुक्तांनी तब्बल ११ पोलीस कर्मचाऱ्यांना निलंबित केले,तर दोन पोलिसांना घरचा रस्ता दाखवत शासकीय सेवेतून बडतर्फ केले आहे.विशेष म्हणजे, पहिल्या टप्प्यात नऊ जण तर दुसऱ्या टप्प्यात दोघेजण निलंबित करण्यात आले आहे.सदरची घटना ठाणे जिल्हा मध्यवर्ती कारागृहातील असून ४ ऑगस्ट २०२५ रोजी ठाणे कारागृहातील सात कैद्यांना औषधोपचारासाठी ठाणे महापालिकेच्या छत्रपती शिवाजी रुग्णालयात गंगाराम घुले यांच्यासह नऊ पोलिसांद्वारे नेण्यात आले.औषधोपचार झाल्यानंतर फसवणुकीतील गुन्हेगार रमेशभाई पांबर आणि करण ढबालीया यांना चक्क एका रिक्षातून बाहेर मद्य पार्टीसाठी करून हॉटेलात जेवणासाठी आणि मौजमजेसाठी नेल्यात आले. सदरची बाब शहरात वाऱ्यासारखी पसरताच पोलिसांच्या भूमिकेवर टीकेची झोड उठविण्यात आली.पोलिसांच्या भूमिकेवर टीकेची झोड उठताच ठाणे पोलिस मुख्यालयामधील गंगाराम घुले यांच्यासह नऊ पोलिस कर्मचाऱ्यांना तात्काळ निलंबित करण्यात आले.त्यानंतर ठाणे शहर मुख्यालयाचे पोलिस उपायुक्त डॉ.पवन बनसोड यांच्याकडे तपास देण्यात आला.तपासात गुन्हेगारांना ‘व्हीआयपी’ सेवा पुरविल्याची बाब उघड होताच परत शिवाजी गर्जे आणि दत्तात्रय जाधव या दोन पोलिस कर्मचाऱ्यांवर दुसऱ्या टप्प्यात निलंबनाची कारवाई करण्यात आली.तर गुन्हेगारांना हॉटेलात मद्य पार्टीसाठी जाण्यास मोकळीक देणाऱ्या ठाणे शहर मुख्यालयातील पोलिस हवालदार गिरीश पाटील आणि पोलिस हवालदार योगेश शेळके यांना पोलिस आयुक्त आशुतोष डुंबरे यांनी शासकीय सेवेतून बडतर्फ केले आहे.सदरची कारवाई पोलिस आयुक्तांनी शुक्रवारी केली.गुन्हेगारांना अश्याप्रकारे पोलिसांनीच सहकार्य करणे,हे अशोभनीय असून समाजात पोलिसांची प्रतिमा मलिन होऊन पोलिसांकडे पाहण्याचा दृष्टिकोन बदलत असतो.गुन्हेगारांना सहकार्य करणारे सेवेत असणे म्हणजे विवक्षित कृत्यांना आणखी बढावा देणे आहे,असे पोलीस आयुक्त आशुतोष डुंबरे यांनी स्पष्ट केले.