उद्रेक न्युज वृत्त
मुख्य संपादक/सत्यवान रामटेके
देसाईगंज(कुरुड) :- देसाईगंज तालुक्याच्या कुरुड गावातील सुशिक्षित बेरोजगार युवक-युवती यांची कळकळ लक्षात घेता ओबीसी काँग्रेस कमिटी प्रदेश सरचिटणीस मनोज भाऊ ढोरे यांनी स्वतः पुढाकार घेऊन नागपूर विभागाचे शिक्षक आमदार सुधाकर अडबाले यांच्या स्थानिक निधीतून सुसज्ज वाचनालयाच्या इमारती करीता भरीव निधी खेचून आणून गावात वाचनालयाच्या इमारत बांधकामाचे नुकतेच भूमिपूजन मान्यवरांच्या हस्ते करण्यात आले आहे.
ओबीसी काँग्रेस कमिटी प्रदेश सरचिटणीस मनोज भाऊ ढोरे हे नेहमीच युवा वर्ग,गोर-गरीब नागरिक, आबालवृद्ध तसेच सर्वसामान्य नागरिकांसाठी कुठले ना कुठले तरी उपक्रम राबवून सामाजिक,शैक्षणिक व इतर कार्य करीत असतात.स्वतःच्या वाढदिवशी दिनी वेगवेगळे सामाजिक कार्य करून शाळेतील विद्यार्थ्यांना साहित्य वाटप करणे,रुग्णालयातील रुग्णांना फळे वाटप करून त्यांना दिलासा देणे तसेच इतर रोजगाराभिमुख बेरोजगार तरुणांसाठी मार्गदर्शनपर शिबिरे,आरोग्यविषयक शिबिरे घेऊन समाजकार्यात स्वतःला झोकून देत आहेत.खरे म्हणजे ‘एकच ध्यास आणि गोर गरीब जनतेचा सर्वांगीण विकास’ असे त्यांचे म्हणणे आहे.
अशातच त्यांच्या मते,२० टक्के राजकारण व ८० टक्के समाजकारण हे त्यांचे ब्रीद असून,त्या प्रमाणे सर्वांनी कार्य केले पाहिजे; अशी त्यांची मनधरणी असून त्याप्रमाणे मनोज भाऊ ढोरे हे कार्य करीत आहेत.त्यामुळेच त्यांच्या कार्याची दखल घेत नागपूर विभागाचे शिक्षक आमदार सुधाकर अडबाले यांनी सुशिक्षित बेरोजगारांना तसेच विद्यार्थी वर्गांना वाचनाची सवय जडावी; यासाठी स्थानिक निधीतून सुसज्ज वाचनालयाच्या इमारती करीता भरीव निधी उपलब्ध करुन दिला आहे.त्यानुसार कुरुड गावामध्ये नुकतेच वाचनालयाच्या इमारतीच्या बांधकामाचे भूमिपूजन गावातील प्रथम नागरिक सरपंचा प्रशाला अविनाश गेडाम,उपसरपंच क्षितिज उके,ओबीसी काँग्रेस कमिटी प्रदेश सरचिटणीस मनोज भाऊ ढोरे,ग्रामपंचायत सदस्य शंकर भाऊ पारधी,अविनाश गेडाम,विलास पिलारे,रेखाताई मडावी,आशाताई मिसार व इतर ग्रामपंचायत सदस्य तसेच गावकरी मंडळी उपस्थित होते.सुसज्ज वाचनालयाच्या इमारती करीता निधी उपलब्ध करुन दिल्याबद्दल गावातील सुशिक्षित युवक-युवती,बेरोजगार बंधू आणि समस्त गावकरी यांनी नागपूर विभागाचे शिक्षक आमदार सुधाकर अडबाले यांचे मनःपूर्वक आभार मानले आहे.
