कुरखेडा तालुक्यातील दोन दारू विक्रेत्यांना न्यायालयाचा दणका; दोघांना सहा महिन्यांचा कारावास..

कुरखेडा(गडचिरोली):-गडचिरोली जिल्ह्यात १९९३ पासून दारू बंदी आहे.दारू बंदी असतांना अनेकजण अवैधरीत्या मोठ्या प्रमाणावर दारू विक्री करतांना दिसून येतात.पोलीस प्रशासनाने मनात ठाणले तर सर्वच्या सर्वच काळे धंदे बंद होतात.पण,कोण अंगाला हळद लावून घेणार.सापडला तो चोर अन्यथा शिरजोर,अशी हल्ली अवस्था झाली आहे.अश्यातच कुरखेडा शहरातील एक व कुरखेडा शहरापासून हाकेच्या अंतरावर असलेल्या वाकडी येथ एका अवैध दारू विक्री करणाऱ्या महिलेला कुरखेडा येथील दिवाणी व फौजदारी न्यायालयाने दणका देत दोघांना ६ महिन्यांच्या कारावासाची शिक्षा सुनावल्याने अवैध दारू विक्रेत्यांचे धाबे दणाणले आहेत.जितेश बाबुराव नैताम रा.कुरखेडा व रूपाली सुखदेव गायकवाड रा.वाकडी,ता.कुरखेडा, जि.गडचिरोली असे शिक्षा सुनावलेल्या आरोपींची नावे आहेत.

शहरातील आरोपी जितेश बाबुराव नैताम याच्या विरोधात कुरखेडा पोलिसांच्या वतीने महाराष्ट्र दारूबंदी कायदा ६५ (ई)अन्वये गुन्हा दाखल करीत दोषारोपपत्र न्यायालयात सक्षमपणे सादर करण्यात आले होते.या प्रकरणाचा न्याय निवाडा करतांना न्यायालयाने ३१ डिसेंबर रोजी जितेश नैताम याला दोषी ठरवत ६ महिने साधा कारावास व २५ हजार द्रव्य दंडाची शिक्षा सुनावली,तर प्रकरणातील आरोपी रूपाली सुखदेव गायकवाड या महिलेलाही न्यायालयाने प्रकरणात दोषी ठरवत ६ महिन्यांचा साधा कारावास व २७ हजार द्रव्य दंडाची शिक्षा सुनावली.न्यायालयाच्या दणक्याने दारू विक्री करणाऱ्यांनी मोठा धसका घेतला आहे.