काळा पैसा पांढरा करण्याचा गोरखधंदा… – गोंदियात ईडीची कारवाई..

गोंदिया :-हवाला व्यापाऱ्यासह धान आणि तांदळाच्या बनावट देयकांत गुंतलेल्या शहरातील १२ प्रतिष्ठानांवर अंमलबजावणी संचालनालयाच्या (ईडी) पथकाने छापे मारल्याची माहिती आहे.मागील दोन दिवसांत छत्तीसगड,रायपूरच्या ईडी पथकाने कारवाई करून काहींना अटक करून त्यांना रायपूर येथे नेण्यात आल्याचेही सूत्रांकडून सांगण्यात आले.मात्र, अधिकाऱ्यांनी यासंदर्भात काहीही बोलण्यास नकार दिला आहे.गोंदियात मोठ्या प्रमाणात काळा पैसा पांढरे करण्याचा व्यवसाय बनावट देयके तयार करून हवाला व्यापाऱ्यांकडून सुरू आहे.छत्तीसगडमधील धानाच्या व्यवसायात तांदूळ घोटाळ्याची कोट्यवधींची रक्कम जिल्ह्यातील व्यापारी आणि हवाला व्यावसायिकांनी रायपूरच्या महादेव ॲपवर हस्तांतरीत केली आहे.त्यावर विविध सामाजिक संस्थांच्या (एनजीओ) माध्यमातून काळा पैसा पांढरा करण्याचा गोरखधंदा अनेक वर्षांपासून सुरू आहे.या अंतर्गत ८ व ९ ऑगस्ट रोजी गोंदियात रायपूर येथील ईडीच्या पथकाने गांधी पुतळा,गोरक्षण मार्केट,गणेशनगर व इतर भागांत असलेल्या व्यापाऱ्यांच्या कार्यालयांवर छापे टाकले.यात अनेक व्यापाऱ्यांकडून महत्वाचे दस्तऐवज जप्त केल्याची माहिती आहे. व्यावसायिकांची चौकशी करून काही व्यावसायिकांना ईडीचे पथक रायपूरला घेऊन गेल्याची माहिती आहे.कोट्यवधींची बेनामी रक्कम ऑनलाईन गेमिंग ॲप महादेव ॲपवर ट्रान्सफर केल्याचीही माहिती सूत्रांनी दिली.असे वृत्त दैनिक नवराष्ट्र वृत्ताने दिले आहे.