कालच पत्रक अन् आजच समर्पण.. गोंदिया पोलिसांपुढे ११ नक्षलवाद्यांची शरणागती..

गोंदिया :-कुख्यात नक्षली माडवी हिडमाचा चकमकीत खात्मा होताच नक्षली संघटना पार भेदरून गेली आहे. सततच्या नक्षलविरोधी कारवायांमुळे नक्षलवाद्यांचा एकमेकांशी संपर्क तुटून कोण कुठे पळाला आणि कोण कुठे लपलाय,हे कळेनासे झाले आहे.त्यामुळेच महाराष्ट्र-मध्य प्रदेश-छत्तीसगड(एमएमसी)विशेष क्षेत्रीय समितीचा प्रवक्ता अनंत याने २४ नोव्हेंबरला आत्मसमर्पणाची तयारी दर्शवत १५ फेब्रुवारीपर्यंत मुदत मागितली होती. यानंतर छत्तीसगडचे गृहमंत्री विजय शर्मा यांनी सरकारकडे अधिक वेळ नाही,माओवाद्यांनी विना विलंब शस्त्रे टाकून आत्मसमर्पण करावे,असे स्पष्ट केले होते. त्यानुसार,काल,गुरुवार २७ नोव्हेंबरला नक्षलवाद्यांनी नवे पत्रक जारी करून १ जानेवारी २०२५ रोजी सर्वजण शस्त्रत्याग करून मुख्य प्रवाहात येऊ,असे जाहीर केले होते.अश्यातच १ जानेवारीपर्यंत आत्मसमर्पणाची तयारी दर्शविणाऱ्या अनंतने मुदतीपूर्वीच शस्त्र ठेवीत दरेकसा दलमच्या ११ नलक्षवाद्यांसह गोंदिया पोलिसांपुढे आज, शुक्रवार २८ नोव्हेंबरला सायंकाळच्या सुमारास आत्मसमर्पण केले.याला गोंदियाचे पोलिस पोलिस अधीक्षक गोरख भामरे यांनी दुजोरा दिला असून यासंदर्भातील संपूर्ण माहिती उद्या शनिवारी स्पष्ट केली जाणार असल्याचे म्हटले आहे.विशेष क्षेत्रीय समितीचा प्रवक्ता अनंत याने पहिला पत्रक २४ नोव्हेंबरला जारी करून १५ फेब्रुवारी रोजी आत्मसमर्पणाची तयारी दर्शविली होती.त्यानंतर,दुसरा पत्रक २७ नोव्हेंबरला जारी केला,त्यात १ जानेवारीला आत्मसमर्पण करणार असल्याचे म्हटले आणि लगेच आज २८ नोव्हेंबरला सरेंडर झाल्याने नक्षल चळवळ आता कमकुवत झाल्याचे दिसून येते.