उभ्या ट्रकला दुचाकीची धडक; दुचाकीस्वार दोघे ठार तर एकजण गंभीर जखमी..

गोंदिया :-देवीच्या दर्शनासाठी निघालेल्या तिघांपैकी दोन तरुणांवर काळाने झडप घातल्याची घटना काल बुधवारी दुपारच्या सुमारास घडली.देवीच्या दर्शनासाठी निघालेल्या दुचाकीस्वारांनी तपासणी नाक्यावर उभ्या असलेल्या ट्रकवर दुचाकी नेऊन आदळली.यात एकाचा घटनास्थळीच मृत्यू झाला,तर एकाचा रुग्णालयात मृत्यू झाला.तीसऱ्याला डोक्याला व पायाला गंभीर दुखापत झाल्याने प्रकृती चिंताजनक असून त्याच्यावर रुग्णालयात उपचार सुरू आहे.संजय मानकर याचा जागीच मृत्यू झाला,तर आशिष फुन्ने याचा छुरिया येथील प्राथमिक आरोग्य केंद्रात मृत्यू झाला.तर श्यामकुमार भोयर याच्या डोक्याला व पायाला गंभीर दुखापत झाल्याने त्याच्यावर राजनांदगाव येथील रुग्णालयात प्राथमिक उपचार करून पुढील उपचारासाठी रायपूर येथे हलविण्यात आले.तिघेही गोंदिया जिल्ह्याच्या देवरी तालुक्यातील शिलापूर/भोयरटोला येथील रहिवासी असून ते एमएच ३५,५१७५ क्रमांकाच्या दुचाकीने छत्तीसगड राज्याच्या डोंगरगड येथील माँ बम्लेश्वरी मातेच्या दर्शनासाठी निघाले होते.जात असतांना वाटेतील चिचोला तपासणी नाक्यावर रायपूरकडे जाणारा एक ट्रक उभा होता.ट्रक उभा असतांनाच दुचाकी वाहन चालकाचे वाहनावरील नियंत्रण सुटले.नियंत्रण सुटताच दुचाकी थेट ट्रकच्या मागील भागास जाऊन जोरदार धडकली.धडक इतकी भीषण होती की,दुचाकीचा समोरील भाग आणि ट्रकच्या मागील भागाचा चुराडा होऊन तिघेही बाजूलाच कोसळले.यात दोघांचा मृत्यू झाला तर एकजण रुग्णालयात उपचार घेत आहे.