ई-मेलद्वारे नागपूरच्या डॉ.बाबासाहेब आंबेडकर आंतरराष्ट्रीय विमानतळाला बॉम्बने उडवून देण्याची धमकी.. – यंत्रणा अलर्ट मोडवर..

नागपूर :-राज्याच्या उपराजधानीत असलेल्या डॉ.बाबासाहेब आंबेडकर आंतरराष्ट्रीय विमानतळाला यापूर्वी मागील महिन्याच्या २५ आणि २६ जून रोजी  बॉम्बने उडवण्याची धमकी देण्यात आली होती.त्यानुसार संपूर्ण यंत्रणा अलर्ट मोडवर येत कुणीतरी मस्करी केल्याचे उघड झाले होते.अश्यातच आता परत पुन्हा एकदा आज,मंगळवार २२ जुलै रोजी विमानतळ प्रशासनाला सकाळी ई-मेलद्वारे विमानतळाला बॉम्बने उडवून देण्याची धमकी मिळाल्याने विमानतळ प्रशासनात एकच खळबळ माजली.अज्ञाताने पाठविलेल्या ई-मेलमध्ये एका सिगारेटच्या बॉक्समध्ये बॉम्ब ठेवला असून,तो कधीही स्फोट होऊ शकतो,अशी माहिती देण्यात आली होती.सदरचा ई-मेल प्राप्त होताच तात्काळ यंत्रणा अलर्ट मोडवर येत सोनेगाव पोलीस स्टेशन, बॉम्ब शोधक-नाशक पथक,औद्योगिक सुरक्षा दल यंत्रणा घटनास्थळी दाखल होत संपूर्ण विमानतळ परिसर पिंजून काढला.बराच वेळ शोध मोहीम राबविल्यानंतर कोणतीही संशयास्पद वस्तू आढळून न आल्याने विमानतळ प्रशासनाने सुटकेचा निःश्वास सोडला.