इंस्टाग्रामवरील रीलची जाहिरात पाहणे गृहिणीला पडली महागात..!

नागपूर :-रोजची दिनचर्या पार पडल्यानंतर अनेकजण फेसबुक,यूट्यूब,इंस्टाग्राम व इतर सोशल मीडिया वरील रील वा इतर मनोरंजनात्मक ऑनलाईन बाबींचा आनंद लुटत असतात.अश्याच प्रकारे एका गृहिणीने इंस्टाग्राम सुरू करून रील पाहणे सुरू केले.रील पाहत असतांनाच ‘वर्क फ्रॉम होम’ ची जाहिरात दिसून आल्याने त्यावर तिने क्लिक करताच आपण सायबर चोरट्यांच्या जाळ्यात केव्हा अडकलोय हेच कळेनासे झाले.कळले तेव्हा तब्बल १२ लाख १६ हजार रुपये गमावले.प्रकरणी सायबर पोलिसांत धाव घेत तक्रार दाखल करण्यात आली. सदरची घटना नागपूरच्या मिनी मातानगर परिसरात राहणाऱ्या अनिता नावाच्या महिलेसोबत घडली असून सर्वसामान्य नागरिक सायबर फसवणुकीच्या जाळ्यात अडकू लागल्याचे दिसून येत आहे.

अनिता नामक महिला या गृहिणी असून इंस्टाग्रामवर रील पाहत असतांना त्यांना वर्क फ्रॉम होमची(Work From Home)जाहिरात दिसली.त्यावर त्यांनी क्लिक केल्यावर घरबसल्या काम करून काही रक्कम रुपये मिळतील, असे सांगण्यात आले.घरबसल्या पैसे मिळणार,या आशेने त्यांनी सुरुवातीला सांगितल्याप्रमाणे काही रक्कम गुंतवली.त्यानंतर जेवढी जास्त रक्कम गुंतवणार तितकाच मोठा परतावा मिळेल,अशी भूलथापा देण्यात आली.या खोट्या आश्वासनांना बळी पडत अनिताने १२ लाख १६ हजार रुपयांची गुंतवणूक केली.बराच कालावधी होऊनही एकही रुपयाचा परतावा मिळाला नसल्याचे लक्षात येताच आपली फसवणूक झाल्याचे लक्षात आले.त्यानुसार महिलेने तात्काळ सायबर पोलिसांकडे धाव घेत तक्रार दाखल केली.त्यानुसार पोलिसांनी अज्ञात आरोपींविरुद्ध गुन्हा नोंदवला असून तपास सुरू केला आहे.कित्येकदा ऑनलाईन फसवणूकीपासून सतर्कता बाळगण्याचे आवाहन करण्यात येते,पण काहीजण सायबर गुन्हेगारांच्या जाळ्यात अडकून बळी पडतांना दिसून येतात.त्यामुळे कुठल्याही आमिषाला बळी न पडता सावधानता बाळगणे आवश्यक आहे.