आता वाहतूक पोलिसांना वाहनांचे डिजिटल कागदपत्रे धरता येणार ग्राह्य..

मुंबई :-डीजी लॉकर वाहनांच्या कागदपत्र ॲपमधील वाहनांचे कागदपत्र दाखवूनही काही वाहतूक पोलीस व अधिकारी वाहन चालकांवर ई-चलन दंडात्मक कारवाई करतात.अशा तक्रारीमध्ये मोठी वाढ झाल्यामुळे अखेर पोलीस सह आयुक्तांनी वाहनांची डिजिटल कागदपत्रे ग्राह्य धरण्यात यावीत,असे कार्यालयीन आदेशच काढले आहेत.त्यामुळे वाहन चालकांना आता मोठा दिलासा मिळणार आहे.

वाहनांमध्ये पूर्वी वाहन नोंदणी प्रमाणपत्र (आरसी बुक) सह विमा पॉलिसी,पीयूसी यांची मूळ प्रत ठेवणे बंधनकारक होते.परंतु केंद्र शासनाच्या रस्ते,वाहतूक आणि महामार्ग मंत्रालय यांच्या निर्देशानुसार वाहन चालक अनुज्ञप्ती आणि वाहन नोंदणी प्रमाणपत्र तसेच अन्य कागदपत्रांची डिजीटल कॉपी डीजी लॉकरवर ठेवू शकतात.परंतु वाहतूक विभागातील काही पोलीस शिपाई व अधिकारी डीजी लॉकरमधील कागदपत्रे दाखवूनही ई चलनद्वारे दंडात्मक कारवाई करीत असल्याच्या तक्रारी गेल्या काही दिवसात वाढल्या होत्या.याची गंभीर दखल वाहतूक विभागाचे पोलीस सहआयुक्त अनिल कुंभारे यांनी घेतली.

वाहतूक नियंत्रण शाखेअंतर्गत असलेले सर्व वरिष्ठ पोलीस निरीक्षक,कर्तव्यावरील पोलीस अधिकारी यांनी वाहन मालक व चालक यांच्याकडे वाहन नोंदणी प्रमाणपत्र,वाहनाचा विमा,पी.यू.सी.यांची मागणी केल्यानंतर वाहन चालकाने त्यांच्या डीजी लॉकरमधील वाहनांची कागदपत्रे दाखवल्यास ती कागदपत्रे ग्राह्य धरण्यात यावीत, या सूचनांची काटेकोरपणे अंमलबजावणी करण्यात यावी; असेही निर्देश सहआयुक्तांनी दिले आहेत.