आता मोबाईल नेटवर्क नसतांनाही पूर्ण होणार ई-पीक पाहणी नोंदणी प्रक्रिया..

उद्रेक न्युज वृत्त :-शेतात कोणत्या पिकांची लागवड केली आहे; याची नोंद घेण्याकरिता शासनाच्या वतीने ई-पीक पाहणी नोंदणी बंधनकारक करण्यात आली आहे. पीकपेरा,नुकसान भरपाई व धान विक्री आदीच्या माहितीकरिता व अपडेट राहण्याकरिता ई-पीक पाहणी नोंदणी आवश्यक आहे.मागील काही वर्षापासून शासनाने शेतकऱ्यांनी लागवड केलेल्या धान पिकाची नोंदणी करण्यासाठी ‘ई पीक ॲप’ची सोय करून दिली आहे.त्यात शेतकऱ्यांनी केलेल्या धान पिकाची नोंद करण्याची सोय आहे.प्रत्यक्षात शेतावर जाऊन शेतकऱ्यांना नोंद घेऊन व फोटो घेऊन त्याची माहिती ॲपवर टाकावयाची असते.मात्र,सदरचा ॲप वापरत असतांना तांत्रिक तसेच मोबाईल नेटवर्क किंवा सर्व्हरच्या अडचणींमुळे ई-पीक  पाहणी नोंदणी प्रक्रिया रखडून शेतकरी मोठ्या अडचणीत सापडत असतात.यासाठी आता महाराष्ट्र राज्यातील ई-पीक नोंदणी प्रक्रियेत नेटवर्क किंवा सर्व्हरच्या अडचणीमुळे शेतकऱ्यांना येणाऱ्या समस्यांवर उपाय म्हणून ऑफलाइन फोटो नोंदणीची सुविधा उपलब्ध करण्यात आली आहे. शेतकऱ्यांनी नेटवर्क नसतांनाही आपल्या शेतातील पिकाचा फोटो काढून ठेवला तर नेटवर्क उपलब्ध झाल्यानंतर तो आपोआप प्रणालीवर अपलोड होईल, अशी माहिती महसूल मंत्री चंद्रशेखर बावनकुळे यांनी विधानसभेत दिली.अर्थसंकल्पीय अधिवेशनातील प्रश्नोत्तराच्या तासात आमदार अनिल पाटील यांनी राज्यातील पीक पेरा नोंदणी प्रक्रियेत येणाऱ्या अडचणींबाबत प्रश्न उपस्थित केला होता.प्रसंगी महसूल मंत्री बावनकुळे यांनी ई-पीक पेरा नोंदणीसाठी आता डीसीएस(DCS)प्रणाली कार्यान्वित करण्यात आली आहे.या प्रणालीमुळे शेतकऱ्यांना नेटवर्क उपलब्ध नसतांनाही शेतातील पिकाचा फोटो मोबाईलवर घेता येतो.नेटवर्क उपलब्ध झाल्यानंतर तो फोटो आपोआप प्रणालीवर अपलोड होतो.त्यामुळे नेटवर्क नसल्यामुळे नोंदणी थांबण्याची समस्या कमी होणार असल्याचे स्पष्ट केले आहे.या निर्णयामुळे ई-पीक पाहणी नोंदणी करणाऱ्या शेतकऱ्यांना एकप्रकारे मोठा दिलासा मिळाला आहे.