अजब कार्यकर्त्याने गजब मागणी करीत तिकिटासाठी केली विरुगिरी; चढला टॉवरवर..

चंद्रपूर :-राज्यातील महाविकास आघाडीकडून जागा वाटपाची बातमी धडकली.बातमी तर धडकली,मात्र ज्यांना पाहिजे होती; त्यांना न मिळाल्याने कार्यकर्ते हिरमुसले,त्यातच एक कार्यकर्ता टॉवरवर चढला असल्याची घटना बुधवारी २३ ऑक्टोंबरच्या दुपारी 3 वाजताच्या सुमारास बल्लारपूर येथील रेल्वे चौकातील बीएसएनएल टॉवर जवळ घडली.

प्रशांत गद्दाला असे पोलिसांनी ताब्यात घेतलेल्या कार्यकर्त्याचे नाव आहे.बल्लारपूर विधानसभा क्षेत्र महाविकास आघाडीच्या कोट्यातून शिवसेना (उबाठा) पक्षाला मिळणार असल्याची खात्री चंद्रपूर जिल्हाप्रमुख संदीप गिहे व पदाधिकाऱ्यांना होती. क्षेत्रात कामाला लागा; असे आदेश उद्धव ठाकरे यांनी गिहे यांना दिले.यामुळे बल्लारपूर विधानसभा क्षेत्र पदाधिकाऱ्यांसह कार्यकर्त्यांनी पिंजून काढत गावागावात मेळावे,संमेलन घेऊन शिवसेनेसाठी पोषक वातावरण निर्माण केले.ठिकठिकाणी मेळावे घेण्यासाठी कार्यकर्तेदेखील जोमाने कामाला लागले होते.शिवसेनेला महाविकास आघाडी कोट्यातून बल्लारपूर विधानसभा सुटणार व संदीप गिहे यांना उमेदवारी मिळणार,अशी अपेक्षा होती.मात्र,बुधवारी दुपारी ३ वाजताच्या सुमारास बल्लारपूर विधानसभा क्षेत्र काँग्रेसला सोडण्याची बातमी धडकली.या बातमीमुळे शिवसेनेत एकच खळबळ उडाली. बल्लारपुरातील कार्यालयासमोर कार्यकते एकवटले. त्यांनी गदारोळ घातला.यावेळी प्रशांत गद्दाला या कार्यकर्त्याने रेल्वे चौकातील बीएसएनएल टॉवरकडे धाव घेत टॉवरवर चढला.त्यामुळे परिसरात गोंधळ निर्माण झाला.त्याला टॉवर चढल्याचे पाहताच पोलिसांनी धाव घेत त्याला ताब्यात घेतले.